28 февраля 2009 г.
Тăван çĕр-шыв хÿтĕлевçисен кунĕ ячĕпе Патăрьел ял тăрăх администрацийĕ пулă тытма юратакансемпе вак касса “Пĕрле пулă тытар” ăмăрту йĕркеленĕ. Унăн тĕллевĕ – кану вăхăтне усăллă ирттересси, сывă пурнăç йĕркине пропагандăласси. Ăмăртăва ирттерме район тата ял тăрăх пуçлăхĕсем – Н.Глуховпа А.Ялуков хутшăннă.
Ăмăрту пĕр турпа, икĕ сехет пынă. Кашни спортмен пĕр вăлтапа çеç усă курнă. Пысăк “телей” кашнинех çакланман. Çапах та ăнăçушăн ыттисенчен ытларах савăнакансем те пулнă.
Тĕрлĕрен номинаципе уйрăм пулăçсенчен Турханти В.Осипов, Елчĕкри А.Смирнов, Шупашкарти А.Аляшкин, Комсомольскинчи А.Хроменко кăмăллă парнесем çĕнсе илнĕ. Командăсенчен вара кÿршĕри Елчĕк районĕн спортсменĕсем пĕрремĕш, Патăрьелсем иккĕмĕш, Канашсем виççĕмĕш вырăнсене йышăннă.