04 марта 2009 г.
Ырă та сывă, тĕреклĕ çынра çеç обществăн малашлăхĕ, шанчăклă пуласлăхĕ. Çавăнпа та кашнийĕн мĕн ачаран хăйĕн сывлăхне çирĕплетме, спортпа туслашма тăрăшмалла. Çак сывă пурнăç йĕркисене аталантарас тĕллевпе нарăсăн 28-мĕшĕнче, хĕлĕн юлашки кунĕнче, Патăрьелĕнчи çĕнĕ стадион çывăхĕнче Сывлăх кунне халалласа район пуçлăхĕн парнине çĕнсе илессишĕн йĕл-тĕрпе чупассипе эстафета иртрĕ. Район пуçлăхĕ Н.Глухов спортсменсене, ăмăртăва хутшăнакансене, курма пынисене сывлăх кунĕпе саламласа малашне те сывă пурнăçа пăхăнса пурăнма ырă суннă хыççăн йĕлтĕр йĕрĕ çине тĕрлĕрен ушкăнри спортсменсем тăчĕç. Çанталăкĕ те ăшă та тÿлек пулнăран та пулĕ, ăмăрту питĕ çивĕч кĕрешÿре иртрĕ. Сывлăх кунне 600-е яхăн çын хутшăнчĕ.
Ăмăрту тăршшĕпех вăйлинчен вăйлисем йĕлтĕр йĕрĕ çинче пĕр-пĕринпе тупăшнине пăхса тăма питĕ кăсăклă пулчĕ. Шкулсенчен чылай чухнехиллех Аслă Чемен, Первомайск, Нăрваш Шăхаль вăтам шку-лĕсенчи спортсменсем пĕр-пĕринпе питĕ тупăшса ăмăртрĕç. Ăста та пысăк хăвăртлăхпа ярăнаççĕ çак шкулсенчи йĕлтĕрçĕсем. Пăхса тăма кăмăллă! Анчах вăйлинчен вăйли пĕрре çеç пулать. Кĕçĕн ушкăнрисенчен те, вăтам шкулсем хушшинче те Аслă Чемен шкулĕнчи спортсменсем пĕрремĕш вырăна тивĕçлипе çĕнсе илчĕç. Учительсен команди те кăтартуллă чупрĕ, иккĕмĕш вырăн йышăнчĕ, ял тăрăхĕ виççĕмĕш призлă вырăнта. Урăхла каласан Аслă Чеменсем ырă та сывă пурнăçа пропагандăлас, лайăх спортсменсем хатĕрлес ĕçре курăмлă ÿсĕм тăваççĕ.
Ытти коллективсенчен учрежденисен ушкăнĕнче Упамсари пуçламăш шкул коллективĕ, спортшкул, райадминистраци уйрăмĕсенчен районти шалти ĕçсен пайĕ, организаци-предприятисенчен райпо, ял тăрăхĕсенчен Хирти Пикшик коллективĕсем район пуçлăхĕн парнине тата диплом илме тивĕçрĕç.
А.ЕГОРОВА.