04 марта 2009 г.
Тутар Сăкăтĕнчи спортзалра Рифкат Куликов воин-интернационалиста асăнса тутарла–пушкăртла кĕрешес енĕпе ăмăрту иртрĕ. Унта тĕрлĕ виçе категорийĕнчи 60 ытла çын хутшăнчĕ. Турнира Тутарстан республикинчен, Комсомольскинчи Урмаелĕнчен те кĕрешÿçĕсем килнĕ.
Ăмăртăва Тутар Сăкăт ял тăрăхĕн пуçлăхĕ салам сăмахĕ каласа уçрĕ. Воин-афганецсен, ветерансен канашĕн председателĕ Ф.Сулейманов, Рифкат Абдулловичăн пиччĕшĕ Р.Куликов, класс ертÿçи пулнă Т.Айзатуллов, тутарла-пушкăртла кĕрешекенсен федерацийĕн президенчĕ Ф.Чабатов, кÿрши М.Куликов, спорт ветеранĕ А.Козлов воин-интернационалист пурнăçне аса илчĕç.
Хăйсен виçисенче Д.Гайнуллин, Б.Халитов, Р.Абянов (Тутар Сăкăт), И.Купкенов, И.Таранов, Р.Садаров, М.Купкенов, А.Чабатов (Шăнкăртам), И.Бикмуллов (Пăва хулинчен) çĕнтерÿçĕсем пулчĕç. Абсолютлă чемпион ята Р.Абянов тивĕçрĕ.
Аслисенчен М.Сабитов, М.Хасянов, Ф.Хафизов лайăх кăтартусемпе палăрчĕç. Чечен республикинчен çар тивĕçне пурнăçласа килнĕ М.Хасянов турнир чемпионĕ пулчĕ.
Çĕнтерÿçĕсене парнесемпе чысларĕç. Ялти ватă С.Хуснетдинов кану вăхăчĕсенче купăспа юрăсем шăрантарчĕ. Шкул ачисем те хăйсен пултарулăхне кăтартрĕç. (Хамăр корр).