04 марта 2009 г.
Ватăсем суд умне тăриччен вут умне тăма хушнă. Ун пек ан пултăр тесен вара пурне те пырса тивекен йĕркене пурин те пăхăнмалла. Шăнкăртамри А.Тазетдинов çамрăк пирки район сучĕ те сăлтавсăрах РФ УКăн 318 статйин 1 пайĕпе килĕшÿллĕн икĕ çуллăха ирĕкрен хăтарса колоние ямалла пирки приговор кăларман.
Çак пăтăрмах 2008 çулхи ноябрĕн 1-мĕшĕнче 23.30 сехетре пулса иртнĕ. Чăваш Республикин Шалти ĕçсен министерствин çул-йĕрпе патруль службин полкĕн командир çумĕ А.Данилов, кадр енĕпе ĕçлекен инспекторсем В.Ивановпа А.Юденко хăйсен управленийĕн приказĕпе килĕшÿллĕн ВАЗ-2110 служба автомобилĕпе çул-йĕр çÿревĕнче право йĕркине пăснине тупса палăртас, автоçулсем çинчи лару-тăрăва асăрхаса тăрас тĕллевпе рейда тухнă. Шăпах вĕсем çулпа пынă вăхăтра Шăнкăртамри Культура çурчĕ умĕнче кĕпĕрленсе тăракан 40-50 çамрăк инспекторсем автомобильпе пыракан çула пÿлсе хунă. А.Юденко инспектор çултан пăрăнма ыйтнине, служба ĕçĕпе рейда тухнине ăнлантарнине вĕсем хирĕçленĕ, çав вăхăтра çул-йĕр патруль службин автомобильне йĕри-тавра хупăрласа илнĕ. Çамрăксем милиционерсене кÿрентермалли намăс сăмахсемпе кăшкăрнă, вĕсен ялне Шупашкартан мар, Патăрьел çул-йĕр патруль службин инспекторĕсем те рейда тухма хăранине каланă. Çав вăхăтра ушкăнтан самай ÿсĕр А.Тазетдинов питĕ хĕрÿленсе пынă та йĕкĕлтешсе А.Юденко инспекторăн аллинчи жезл мĕнле туя пулнине ыйтнă, унтан унăн аллинчи транспортсене çул çинче чармалли хатĕре çапса ÿкернĕ. Милиционер ăна лăпланма ыйтнă, анчах вăл пурпĕрех вĕриленнĕ, хăй патĕнчен чыша-чыша янă, юлашкинчен тĕп хуларан служба ĕçĕпе килсе хăйĕн тивĕçне пурнăçлакан инспектора пуçĕпе пуçне çапнă, унтан урипе кăкăр шăмминчен тапнă. Вăл милиционера хирĕç тăнăшăн пуçран шăлманнине те шутламан-ши; Е хăйне çав тери паттăр пек туйнă-ши; Пĕрин паттăрлăхне кура ыттисем те лăпланса тăман. Инспекторсен машинине хупăрласа илсе çапнă, тапнă. Шăпах çак вăхăтра инспекторсем радиоçыхăнупа хăйсен тепĕр ушкăнне пулăшма чĕнсе илнĕ. Автомашинăпа васкаса тепĕр экипаж çитнĕ. В.Саинов автоинспектор право йĕркине хирĕç тăракан А.Тазетдинова лăпланма, хĕрÿлĕхе чакарма ыйтнă. Преступник каллех унăн сăмахĕсене пуçа илмен. Ун вырăнне В.Саинов инспектора питĕнчен çапса янă, амантнă, юн кăларнă.
Çак каçхине пирĕн районта ЧР Шалти ĕçсен министерствин ГИБДД управленийĕн 6 экипажĕ, 13 инспектор çул-йĕр патруль службин нарячĕпе пулнă. Çавăнпа та 2008 çулхи ноябрĕн 1-мĕшĕнче Шăнкăртамра пулнă преступленилле ĕçе хăйсем куçĕпе курнă.
Судра А.Тазетдинов власть представителĕсене тапăннă ĕçе пурне те йышăнман. Хăй каланă тăрăх, çак каçхине 20 сехетсенче вăл Шăнкăртамри клуба ташă каçне кайнă. 21 çулхи çамрăк 0,5 литр кĕрекен икĕ кĕленче сăра ĕçнĕ. Çакă ăна ÿсĕрĕлме çитнĕ. Çурçĕр çитеспе вăл клубран тухнă та шăпах ял çамрăкĕсем Шупашкарти ГИБДД ĕçченĕсемпе вăрçăннине, тавлашнине курнă. Юлашкинчен вара вăл пуринчен те паттăрри пулма шутланă. Йĕркене хирĕç тăнăшăн ăна район сучĕ айăплă тесе йышăннă.
В.ЕГОРОВ,
следстви пайĕн аслă следователĕ.