04 марта 2009 г.
Кирек мĕнле ачана та мул париччен ăс пама ыйтнине кашни ашшĕ-амăшĕ пĕлет. Анчах та чăн пурнăçра вăл пурин те пĕр пек пулса пымасть. Пĕрисен ачисем сĕт шăлĕ тăкăничченех шухă та киревсĕр пулни паллă. Çавнашкаллисем шкулта та уйрăм тимлĕхре, районти шалти ĕçсен пайĕн çул çитменнисен уйрăмĕнчи хура списокра тăраканнисем те пур. Теприсем вара ашшĕ-амăшĕ е учитель асăрхаттармасăрах ыттисемшĕн ырă тĕслĕхлĕ. Вĕсем спортра та хастар, ытти мероприятисене хутшăнма та вăхăт тупаççĕ. Вĕренÿре те кăтартуллă. Ун пек ачасем çамрăкла йăнăшасран, эрех-сăра, наркомани енне туртăнасран, преступлени тăвасран та сехĕрленмелле мар.
Çапах кирек мĕнле пулсан та паянхи кашни çул çитмен çамрăк пурнăç сиенĕ, сывлăх тăшманĕ, тĕтреллĕ пуласлăх мĕнрен килнине пĕлсе тăмалла, çав тĕрĕс мар çултан пăрăнмалла. Районти шалти ĕçсен пайĕн çул çитмен ачасемпе ĕçлекен уйрăмри инспекторсем кашни кун тенĕ пекех шкулсенче пулса тĕрлĕ çулсенчи ачасемпе уçă калаçусем ирттереççĕ, уйрăм темăсемпе лекцисем йĕркелеççĕ. Черетлĕ тĕл пулу Первомайскинчи вĕрентÿ центрĕнчи 9-11-мĕш класс ачисемпе иртрĕ.
Аслă класра вĕренекенсене чăн малтанах районти шалти ĕçсен пайĕн çул çитмен ачасемпе ĕçлекен инспекторĕ В.Урукова иртнĕ çулхи ĕç итогĕпе паллаштарчĕ, ачасем ытларах мĕнле преступлени тунипе, хура ĕç тăвассинчен мĕнле асăрханмаллине, обществăлла вырăнта хăйсене мĕнле тытмаллине каларĕ, çул çитмен ачасене пырса тивекен саккунсемпе паллаштарчĕ. Вера Анатольевна 2008 çулта районта хулиганла ĕçсем тăвакансем хушшинче хĕрачасем те пулни çинчен пăшăрханса каларĕ. Пĕр тĕслĕхĕнче çул çитмен хĕрачасем ташă каçĕнче ирĕккĕн ташлама вырăн çитменшĕн, тепринче вара пĕр-пĕрин çиллине каçараймасăр, калаçса татăлаймасăр алă вăйĕпе усă курнă. Хĕрупраç тени яланах илемлĕ те сăпайлă, йăваш та ĕçчен пулмалла пек. Çакнашкал тĕслĕхсем пулни, паллах, тĕлĕнтерет.
Тĕл пулура В.Урукова инспектор кĕсье телефонĕсемпе питĕ асăрхануллă пулмаллине, вĕсене шкула илсе çÿреме кирлех те маррине ăнлантарса каларĕ.
Ашшĕ-амăшĕпе учительсене, инспекторсене, сиплев учрежденийĕн тухтăрĕсене пăшăрхантаракан тепĕр ыйту вăл – ачасем эрех-сăра, чикарккă таврашĕ енне туртăнни. Кашни уйăхра тенĕ пекех çул çитмен 4-5 ача эрех-сăра ĕçсе обществăлла вырăнта хăйсене пÿтсĕр тытнипе йĕрке хуралçисен аллине çакланаççĕ. Пĕрлехи рейда хутшăннă врач-инфекционист А.Чернова вĕренекенсене çамрăклах эрех-сăрапа, чикарккăпа явăçни, малашлăх пурнăçра мĕнле синкерлĕх патне илсе пынине тĕплĕн ăнлантарса пачĕ. ВИЧ-инфекци, СПИД чирĕсен хăрушлăхĕ пирки чарăнса тăчĕ. Специалист каланă тăрăх, пирĕн республикăра та çак чир сарăлсах пырать. Хальхи вăхăтра Чăваш Енре унпа сиенленнисем 953 çын, пирĕн районта вара тупса палăртнисем пиллĕкĕн. Урăхла каласан, тĕрлĕ мелпе тепĕр çынна çакланакан çак чиртен çамрăксен те, аслисен те сыхланмалла.
Рейд бригади вĕрентÿ центрĕнче ачасене право йĕркине, хăйсене пырса тивекен саккунсене вĕрентес, хулиганла ĕçсем тăвакан ачасемпе социаллă педагогсем, ытти учительсем уйрăмшарăн епле ĕçленине тĕрĕслерĕ.
Çакнашкал тĕллевлĕ тĕл пулупа, пĕрлехи рейд бригади Шăнкăртамри икĕ шкулта та пулчĕ, шкулта хулиганла ĕçсем тума хăтланакансемпе мĕнле ĕçленипе, ачасене тивĕçлĕ воспитани парассинче ашшĕ-амăшĕн витĕмĕ епле пулнипе кăсăкланчĕ. Икĕ шкуллă пысăк ялта каçхине ашшĕ-амăшĕн патрульне ăнăçлă йĕркелени чылай шкул коллективĕшĕн ырă тĕслĕх вырăнĕнче пулмалла. Çакăн результачĕ пурах.
Пĕрлехи рейд бригади:
В.УРУКОВА, И.КОЗЛОВ,
районти шалти ĕçсен пайĕн çул çитмен ачасемпе ĕçлекен инспекторĕсем;
А.ЧЕРНОВА,
районти тĕп больницăн
врач-инфекционисчĕ;
А.ЕГОРОВА,