Публикации » Кризис кашнине экономист пулма та вĕрентет

13 марта 2009 г.

Тĕнче шайĕнче кĕрлекен укçа-тенкĕпе çыхăннă йывăрлăха хăшĕсем туйма та ĕлкĕрчĕç, теприсем сисмерĕç пулĕ-ха. Хăш-пĕр уйрăм çемьесем çак йывăрлăх серепине çакланчĕç темелле. Ку чухне чылай вăйпитти Мускава е ытти пысăк хуласене ĕçлеме çÿрет. Ара, çемьене кирек мĕнле пулсан та тытса тăмалла-çке. Çурт-йĕрне те çĕнетмелле, ачи-пăчине те вĕрентмелле. Пурнăçăн ытти тăкакĕсем те тупăнсах тăраççĕ. Анчах та хальхи вăхăтра пирĕн строительсене пысăк хуласенче те икĕ алăпах хапăл тумаççĕ-мĕн, мĕншĕн тесен вĕсенче те шалу тÿлеймеççĕ. Çавăнпа та паян кашнийĕн хăйне кура экономист пулмалла, вырăнти условисенче ĕçлесе тунă укçана перекетлĕ те тирпейлĕ усă курма тăрăшмалла.