13 марта 2009 г.
Нăрваш Шăхалĕнчи вăтам шкулта районти шкул ачисен Спартакиадин программи тăрăх хĕллехи полиатлон енĕпе ăмăртусем иртрĕç. Кунта арçын ачасем пневматикăллă винтовкăран тĕл перессипе, турник çинче туртăнассипе тата йĕлтĕрпе хăвăрт чупассипе тупăшрĕç. Хĕр ачасем те винтовкăран печĕç, отжимани турĕç тата йĕлтĕрпе чупрĕç. Малтан пурте пневматикăллă винтовкăран печĕç. Чи çивĕч куçлисем вара çаксем пулчĕç. Вăтам шкулсенчен О.Тинюкова (Сăкăт), А.Григорьева (Н.Шăхаль), А.Капитонова (Патăрьелĕнчи 2-мĕш вăтам шкул), А.Адикин (Н.Шăхаль) С.Чернов (Хирти Пикшик), А.Еразумов (Н.Шăхаль). Тĕп шкулсенчен В.Фролова (Аслă Чемен), С.Арланова (Кивĕ Ахпÿрт), Ю.Плешкова (Анат Туçа), А.Кошкин (Кивĕ Ахпÿрт), А.Кудряшов (Аслă Чемен), А.Марков (Кивĕ Ахпÿрт). Малалла çамрăк спортсменсем турник çинче туртăнса вăйĕсене тĕрĕслерĕç. Чи вăйлă алăлли Алексей Адикин (Н.Шăхаль) пулчĕ. Вăл 40 хутчен(!)туртăнса пурне те тĕлĕнтерчĕ. Икĕмĕш вырăнта К.Петров – 28 хут (Патăрьелĕнчи 1-мĕш шкул), виççĕмĕшне иккĕн – А.Петровпа (Хирти Пикшик) В.Фролов (Аслă Чемен) пайларĕç.
Хĕр ачасенчен чи нумай отжимани тăваканнисем Аслă Чемен хĕр ачисем пулчĕç: Л.Антонова – 75 хутчен, А.Медведева – 68 хутчен, М.Макарова – 56 хутчен.
Тĕп шкулсен арçын ачисенчен чи вăйли А.Кудряшов – 21 хут, А.Кошкин (Кивĕ Ахпÿрт) – 18 хут, Треньелĕнчи шкулти А.Лепешкин тата Р.Мидуков 15-шер туртăнса виççĕмĕш вырăнта. Хĕр ачасенчен чи вăйлă алăлли В.Фролова (Аслă Чемен) 60 хутчен, Л.Сулагаева (Шăхач) 55 хутчен, С.Арланова (Кивĕ Ахпÿрт) 50 хутчен отжимани туса 1, 2, 3-мĕш вырăнсенче пулчĕç, нумай очкосем пуçтарчĕç. Малалла спортсменсем йĕлтĕр йĕрĕ çине тухрĕç. Вăтам шкулсенчи арçын ачасем пилĕк çухрăмлă дистанцинче тупăшрĕç. Патăрьелĕнчи 1-мĕш шкулта вĕренекен К.Петров дистанцие чи хăвăрт, 19 минут та 11 секундра вĕçлерĕ, ун хыççăн темиçе секундран финиша йĕлтĕр йĕрĕн хуçисем А.Еразумов тата В.Григорьев çитрĕç. Хĕр ачасенчен Аслă Чемен шкулĕнчи М.Макаровăпа А.Медведева пĕрремĕшпе иккĕмĕш вырăнсенче пулчĕç, виççĕмĕш вырăнта А.Михайлова (Н.Шăхаль). Тĕп шкулсенчен виçĕ çухрăмлă дистанцие чи хăвăрт вĕçлекеннисем каллех Аслă Чементи вăтам шкулти Ф.Яппаровпа А.Кудряшов пулчĕç. Виççĕмĕш вырăнта В.Черноглазов (Нăрваш Шăхаль). Хĕр ачасенчен икĕ çухрăмлă хушша чи хăвăрт шуса тухаканни А.Макарова (Аслă Чементи вăтам шкул) пулчĕ. Ун хыççăн кăштахран финиша С.Михайлова (Н.Шăхаль) çитрĕ. Виççĕмĕш вырăнта – В.Фролова (Аслă Чемен).
Çапла вара çак виçĕ результата хушса очкосем çине куçарсан, 210 очко пуçтарса Нăрваш Шăхалĕнчи вăтам шкулти А.Адикин Спартакиадăн чемпионĕ ятне çĕнсе илчĕ. Иккĕмĕш вырăнта 183 очкопа К.Петров (Патăрьелĕнчи 1-мĕш шкул), виççĕмĕшĕнче – А.Еразумов (Н.Шăхаль). Хĕр ачасенчен çĕнтерÿçĕ ятне 224 очкопа А.Медведева (Аслă Чементи вăтам шкул) çĕнсе илчĕ. Иккĕмĕш вырăнта 207 очко пуçтарса А.Григорьева (Н.Шăхаль) пулчĕ. Виççĕмĕш вырăнта вара тÿрех иккĕн пĕр пек очкопа А.Михайлова (Нăрваш Шăхаль), М.Макарова (Аслă Чементи вăтам шкул) пулчĕç. Тĕп шкулсен командинчи йĕлтĕрçĕсенчен чи пултаруллисем пĕр пек, 184-шар, очко пуçтарса А.Кудряшов, Ф.Яппаров пулчĕç. Виççĕмĕш результат 166 очко пуçтарса А.Кошкин кăтартрĕ. Хĕр ачасенчен чемпион ятне 218 очкопа В.Фролова (Аслă Чемен) çĕнсе илчĕ. Унăн командăри юлташĕ А.Макарова иккĕмĕш вырăнта, виççĕмĕшĕнче вара – А.Прокопьева (Ишлĕри шкул). Шкулсенчен пĕрремĕш вырăна Нăрваш Шăхалĕнчи вăтам шкулăн туслă команди çĕнсе илчĕ. Иккĕмĕш вырăнта Аслă Чементи, виççĕмĕшĕнче – Патăрье-лĕнчи иккĕмĕш номерлĕ вăтам шкул команди пулчĕç. Тĕп шкулсен командисенчен чи маттурри Аслă Чементи шкул команди, иккĕмĕш вырăнта Шăхачри шкул команди, виççĕмĕшĕнче Нăрваш Шăхалĕнчи шкул команди.
Нăрваш Шăхалĕнчи вăтам шкул спортзалĕнче районти РОСТО организацийĕ йĕркеленипе пневматикăллă винтовкăран тĕл перессипе те ăмăрту иртрĕ. Унта шкул ачисемсĕр пуçне аслисем те вăтăра яхăн хутшăнчĕç. Шкул ачисен хушшинче пилĕк хутчен персе 50 очко илме май пур çĕртен Аслă Чементи вăтам шкул хĕр ачи В.Фролова 39 очко илсе çĕнтерÿçĕ ятне илчĕ. Иккĕмĕш вырăнта Кивĕ Ахпÿртри шкул хĕр ачи С.Арланова, виççĕмĕшĕнче Ю.Плешкова (Анат Туçа) пулчĕç. Арçын ачасенчен чи тĕл перекенни Кивĕ Ахпÿртри А.Кошкин – 43 очко – пулчĕ. Унăн юлташĕ А.Марков виççĕмĕш вырăнта, иккĕмĕшĕнче вара, 36 очкопа, А.Кудряшов (Аслă Чементи вăтам шкул). Аслă классенче вĕренекенсенчен чи çивĕч куçли А.Адикин (Нăрваш Шăхалĕнчи вăтам шкул), 43 очко, С.Черновăн (Хирти Пикшик) 43 очко, А.Еразумовăн (Нăрваш Шăхалĕнчи) 40 очко. Хĕр ачасенчен чи пултарулли О.Тинюкова (Сăкăтри вăтам шкул) – 41 очко. Иккĕмĕшпе виççĕмĕш вырăнсене пĕр пек 38 очко илсе А.Григорьевăпа (Нăрваш Шăхалĕнчи вăтам шкул) А.Капитонова (Патăрьелĕнчи иккĕмĕш номерлĕ вăтам шкул) тухрĕç.
Аслисен хушшинче те çивĕч тупăшу пычĕ. Маттуррисенчен те маттурри вара Патăрьелĕнчи ачасемпе çамрăксен спортшкулĕнче тренер пулса ĕçлекен, спорт мастерĕн кандидачĕ И.Алеев 46 очко пухрĕ. Иккĕмĕш вырăнта Ю.Васильев (“Труд” хуçалăх), виççĕмĕшĕнче А.Григорьев. Хĕрарăмсенчен чи çивĕч куçли Нăрваш Шăхалĕнчи вăтам шкул директорĕ В.Платонова. Иккĕмĕш вырăнта – Т.Кудряшова, виççĕмĕшĕнче вара Т.Сергеева пулчĕç. Юлашкинчен çĕнтерÿçĕсене тата призлă вырăнсене йышăннă спортсменсене дипломсем парса чысларĕç.
В.БОРОДКИН.