18 марта 2009 г.
2009 çулхи нарăс-ака уйăхĕсенче пирĕн республикăра йăлана кĕнĕ “Литературăллă Чăваш Ен: чи лайăх вуланакан кĕнеке - 2007” конкурс иртет. Ăна Чăваш Наци библиотеки йĕркелет.
Конкурсăн тĕп тĕллевĕсем: кĕнеке вулама юратакансем ытларах мĕнле темăпа кăсăкланнине пĕлесси, халăха вулавăшсене çÿреме явăçтарасси, вырăсла пичетленнĕ чи нумай вуланакан кĕнеке авторĕсене палăртасси.
Çак конкурса 2007 çулта пичетленсе тухнă 139 кĕнекене кĕртнĕ. Вĕсен йышĕнче 77 кĕнеке чăвашла, 62-шĕ вара - вырăсла. Çав шутран 9 произведени авторĕ - пирĕн ентешсем.
Республика шайĕнче иртекен конкурса районти пĕтĕм библиотека хутшăнать. Вулавăш хуçисем конкурсри кĕнекесен куравне йĕркеленĕ. Тĕрлĕ произведени тăрăх вулав конференцийĕсем, викторинăсем, конкурссем, презентацисем, писательсемпе тата поэтсемпе тĕл пулусем ирттерме палăртнă.
Вулавăшсенче конкурс ыйтăвĕсене тĕплĕн тишкерсе вулакансем патне çитернĕ, вĕсене валли темиçе ыйтуран тăракан анкетăсем хатĕрленĕ. Конкурса пĕтĕмлетме Патăрьелĕнчи тĕп библиотекăра 5 çынран тăракан ĕçлĕ ушкăн туса хунă. Вĕсем йăлтах пĕтĕмлетÿ туса наци библиотекинчи жюри комиссине ярса параççĕ.
Хисеплĕ вулакансем! Пурне те конкурса хутшăнма чĕнетпĕр! Хуравăрсем сире килĕшекен литературăна пичетлесе кăларма, вулавăшсене халăх ытларах ыйтакан кĕнекесемпе тивĕçтерме пулăшĕç.
Н. РАКОВА,
тĕп библиотека ĕçченĕ.