18 марта 2009 г.
Чăн-чăн уяв турĕç çăварни кунĕнче Аслă Чемен ял тăрăхĕнче пурăнакансем. Ирхине 10 сехете Тури Чакăри культура çуртне халăх лăк тулли пуçтарăнчĕ. Хĕр ачасемпе хĕрарăмсем çÿçеллĕ тутăрсемпе, нумайăшĕ чăваш кĕписемпе, илемлĕ тĕрĕллĕ саппунсемпе. Унта та кунта шăнкăрав çакнă, илемлетнĕ лашасем. Уява пуçланă май, клуб ертÿçи В. Петрова пурне те уяв ячĕпе саламларĕ. “Хунав” ача садĕнчи аслă ушкăн тата вăтам шкулта 7-мĕш класра вĕренекенсем çăварнин йăла-йĕркипе, сăвви-юррипе паллаштарчĕç. З. Латышева ертсе пынипе хăрарăмсен ушкăнĕ концерт кăтартрĕ. Унтан тĕрлĕрен вăйă, конкурс пулчĕ. Спорт ăмăртăвĕсенчен вĕрен туртса Тури Чакăсем, калуш ывăтса Светланăпа Саша Кошелевсем çĕнтерчĕç. Çĕнтерÿçĕсене пурне те парнесем кĕтрĕç. Комисси членĕсем илемлетнĕ лашасене те хакларĕç. 5-мĕш округри “Садовая” урамра пурăнакансем В.Башмаковăн “Красотка” лашине вĕрсе хăпартнă хăмпăсемпе, чечексемпе, тутăрсемпе илемлетнĕ. Вăл 1-мĕш вырăна тухрĕ. Лаша йĕри-тавра çăварни, хĕле ăсатни çинчен çырнă каларăшсем, юрă-сăвă йĕркисем. Çак урамра пурăнакансем питĕ туслă пуçтарăннă. Çăварни юррине шăрантарса пур лаша та пĕр çаврăм чупса тухрĕç. Унтан пурте юрларĕç, ташларĕç, савăнчĕç. Вĕри чейпе икерчĕ çирĕç. Юлашкинчен катемпие çунтарчĕç. Н.КОШЕЛЕВА.