Публикации » Çĕнтерÿпе таврăннă

18 марта 2009 г.

Нумай пулмасть Шупашкарта ирĕклĕ майпа кĕрешессипе ăмăрту иртрĕ. Ку хутĕнче 1992-1993 çулсенче çуралнисем вăй виçрĕç. Ăмăртăва пурĕ 120 кĕрешÿçĕ хутшăнчĕ. Пирĕн районтан И.Алеев, Н.Трифонов, М.Зейнетдинов тренерсем хатĕрленĕ спортсменсен команди кайрĕ. Шел пулин те, тĕрлĕ сăлтавсене пула командăн пĕтĕм составĕ пулаймарĕ. Ăмăртура 54 килограмлă виçеллисем хушшинче Нăрваш Шăхаль шкулĕнче вĕренекен А.Адикин чемпион ятне çĕнсе илчĕ. Çирĕм ытла кĕрешÿçĕсен хушшинче Алексей мала тухни пурне те савăнтарчĕ. 44 килограмлă виçеллĕ спортсменкăсенчен А.Лисицына çĕнтерÿçĕ ятне тивĕçрĕ. Патăрьелĕнчи пĕрремĕш шкулта вĕренекен Д.Чинкина 56 килограмлă виçеллисем хушшинче пынă тупăшура иккĕмĕш вырăна тухрĕ. Тренерсемшĕн çак кăтарту пысăк савăнăç.

В. БОРОДКИН.