21 марта 2009 г.
Чăваш Республикинчи хуласемпе районсем физкультурăпа спорт тата сывлăха çирĕплетес енĕпе 2008 çулта мĕнле ĕçленине палăртмалли смотр-конкурса пĕтĕмлетнĕ. Патăрьел районĕ унта хисеплĕ виççĕмĕш вырăна йышăннă. Сăмах май каласан, пирĕн район ку конкурсра çулленех е çĕнтерÿçĕ, е призер пулать.
Хисеплĕ вырăна çĕнсе илесси ахальтен пулман. Районта ачасемпе çамрăксене, ĕçлекен халăха физкультурăпа спорта явăçтарас енĕпе тĕллевлĕ ĕç-леççĕ. Спорт секцийĕсемпе ушкăнĕсене халăхăн 26 ытла проценчĕ çÿрет. Шкулсенчи ятарлă медицина ушкăнĕсенче ачасене 100 проценчĕпех физкультурăна явăçтарнă. 2008 çулта районĕпе 1-мĕш разрядлă 4 спортсмен, спорт мастерĕн 13 кандидатне хатĕрленĕ. Спортăн 10 енĕпе ял тăрăхĕсем, 23 енĕпе шкул ачисен спартакиадисем пыраççĕ. Хуçалăхсенче ертÿçĕсен парнисемшĕн комплекслă спорт ăмăртăвĕсене ирттересси йăлана кĕчĕ.
Итогсене пĕтĕмлетнĕ чухне çак кăтартусене шута илнĕ: физкультурăпа спорта явăçнисен хисепне, спорт секцийĕсене тата пурăнакан вырăнта физкультурăпа спорт ушкăнĕсене çÿренине, шкул ачисене ятарлă медушкăнсенче физкультурăна явăçтарнине, физкультурăпа тата спортпа кăсăкланакан хĕрарăмсен, аслă тата вăтам пĕлÿллĕ специалистсен шутне, “Зарница”, “Орленок” çарпа спорт вăййисен республикăри финалне хутшăннине, ЧР Президенчĕн Кубокĕшĕн шкул ачисен спартакиадинче, ялти спорт вăййисенче ăмăртнине, ачасемпе çамрăксен спорт шкулĕсене 6-15 çулхи ачасене явăçтарнине, республикăри ăмăртусене хутшăннине, 1-мĕш разрядлă спортсменсем, спорт мастерĕн кандидачĕсем, спорт мастерĕсем, тĕнче класлă спорт мастерĕсем хатĕрленине.
Çÿлерех асăннă кăтартусем кăçал тата пысăкрах пулччăр тесен физкультурăпа спорт ĕçне вăйлатас тесе тата та ытларах ĕçлемелле. Ку спортшăн яваплисене çеç мар, ял тăрăхĕсен, учрежденисемпе организацисен, предприятисен, хуçалăхсен ертÿçисене те пырса тивет.
А.АЛЕКСЕЕВ.