21 марта 2009 г.
Нăрваш Шăхалĕнче мĕнле кăна шайри ăмăртусем иртмеççĕ! Нумай пулмасть республикăри зонăри ăмăртăва та кунтах йĕркелерĕç. Ултă район команди хутшăнмаллаччĕ, анчах Комсомольскинчен килеймерĕç. Çапла вара Канаш хули, Елчĕк, Шăмăршă, Тăвай тата Патăрьел районĕсен ушкăнĕсем вăй виçрĕç.
Çивĕч тупăшу Канашри спорт шкулĕнчи хĕр ачасемпе Патăрьел районĕнчи шкулсенче вĕренекенсем хушшинче пулчĕ. К.Кириллова (Канаш) стартранах питĕ хăвăрт хускалса кайрĕ, дистанцие вĕçличченех никама та çывхартмарĕ. Финиша пĕрремĕш кĕчĕ. Пирĕн районти А.Медведева (Чемен) темле тăрăшсан та 14 секунд выляса ячĕ, иккĕмĕш вырăн йышăнчĕ. Унăн юлташĕ М.Макарова виç-çĕмĕш тухрĕ.
Малалла старта арçын ачасем тухрĕç. Вĕсен 10 çухрăм чупмалла. Шăпа тăрăх йĕлтĕр йĕрĕ çине пĕрремĕш пирĕн районти Аслă Чемен шкулĕнчи Ф.Яппаров тăчĕ. Вăл дистанцие лайăх вăхăтпа чупса тухрĕ. Ыттисем ун вăхăтне лайăхлатма тăрăшрĕç. Каччăсем хушшинче каллех Канашри А.Петровпа Первомайскинчи В.Павлов хушшинче çивĕч тупăшу пычĕ. Хула спортсменĕ мала тухрех, вăл финиша Володьăран 40 секунд маларах çитрĕ. Виççĕмĕш вырăна Н.Иванов (Тăвай районĕ) çĕнсе илчĕ.
Командăна лекеймен хĕр ачасене – икĕ, арçын ачасене виçĕ çухрăма ăмăртма ирĕк пачĕç. Чи пултаруллисем çаксем пулчĕç: А.Медведев (Чемен), А.Азизов (Канаш), А.Константинов (Канаш). Хĕр ачасенчен малти вырăнсене Векова (Елчĕк), Ефимова (Канаш), Кабатова (Канаш) тухрĕç.
Юлашкинчен 6 хĕр ачан, 6 арçын ачан результачĕсене очко çине куçарса хăш район команди мала тухнине палăртрĕç. Пĕрремĕш вырăна Патăрьел районĕн шкул ачисен команди тухрĕ. Иккĕмĕшĕнче – Канаш, виççĕмĕшĕнче Шăмăршă командисем пулчĕç.
В.МИХАЙЛОВ.