25 марта 2009 г.
Нăрваш Шăхалĕнче СССР спорт мастерĕн Николай Арсентьевич Николаевăн парнисене çĕнсе илессишĕн йĕлтĕрçĕсен эстафетăллă ăмăртăвĕ иртрĕ. Николай Арсентьевич хăй вăхăтĕнче темиçе хутчен Чăваш Республикин чемпионĕ пулнă, РСФСР-ăн пĕрлештернĕ командине кĕнĕ, Тĕнче Кубокне çĕнсе илмелли ăмăртăвăн пĕр тапхăрĕнче ăмăртнă. Хăй килеймерĕ пулин те, ăмăрту кăсăклă, çÿллĕ шайра иртрĕ.
Ăмăрту парачĕ хыççăн старта çемье командисем тăчĕç. Çивĕч кĕрешÿ виçĕ команда хушшинче пычĕ. Малтанхи тапхăрта Бородкинсен çемйи малта пычĕ, иккĕ-мĕшне Михайловсемпе Николаевсен çемйисем маларах вĕçлерĕç. Юлашки тапхăрта вĕсен ачисем тупăшрĕç. Çивĕч тытăçура финиша чи малтан Михайловсен команди çитрĕ. Иккĕмĕш вырăнта Бородкинсен çемйи, виççĕмĕшĕнче – Николаевсем.
Малалла ăмăртăва ĕç коллективĕсен командисем тăсрĕç. Çичĕ команда хушшинче чи пултарулли – “Снежана” магазин коллективĕ. Вĕсем хыççăн финиш йĕрне Нăрваш Шăхалĕнчи фельдшерпа акушер пунктĕнче ĕçлекенсем касрĕç. Виççĕмĕш вырăна Вăрманхĕрри Шăхалĕнчи фельдшерпа акушер пунктĕнче ĕçлекенсем тухрĕç.
Унтан бригадăсен командисем вăй виçрĕç. Ăмăрту çивĕч пычĕ. Виçĕ команда пĕр-пĕринчен 5-10 сек. юлса пырса финиш енне васкарĕç. Пĕрремĕш бригада команди чи малтан çитрĕ. Кăштахран иккĕмĕш бригада команди финиша кĕчĕ. Виççĕмĕш вырăнта – виççĕмĕш бригада йĕлтĕрçисем.
Программăпа килĕшÿллĕн старта чи кĕçĕн çулхи шкул ачисем те тухрĕç. Финиша чи малтан Лена Адикина çитрĕ. Иккĕмĕш вырăнта Настя Чебукова, виççĕмĕшĕнче – Вероника Краснова. Арçын ачасенчен чи пултарулли – Алексей Калашников. Ун хыççăн финиша Валерий Шайманов çитрĕ, виççĕмĕшĕнче – Никита Селиванов.
Вĕсем хыççăн ăмăртăва кам йĕлтĕр спортне юратать, çавсем тăсрĕç, кунта та çивĕч тупăшу пулчĕ.
Малалла ял халăхĕ спортзала пуçтарăнчĕ. Кунта пневматикăллă винтовкăран тĕл перессипе тупăшрĕç. Пурĕ 45 арçынпа хĕрарăм ăмăртрĕ. Чи çивĕч куçлисем çаксем: Ю. Васильев, В. Афанасьев, В. Григорьев.
Юлашкинчен мини-футболла выляса тупăшрĕç. Ултă командăран чи ăнăçлă выляканни – студентсен команди. Вăл пĕрремĕш вырăна тухрĕ, иккĕмĕшĕнче Молодцыгин урамĕнчи çамрăксен команди, виççĕмĕшĕнче – пĕрремĕш бригадăри “Ермак” команда.
В.БОРОДКИН,
ăмăрту судйи.