28 марта 2009 г.
Çак кунсенче Шăмăршă районĕнчи Васанти вăтам пĕлÿ паракан шкулта Çĕр ĕçченĕн çулталăкне халалласа Шăмăршă, Патăрьел, Елчĕк районĕнчи чăваш чĕлхипе литературине вĕрентекенсен фестивалĕ иртрĕ.
Анат Чаткас тĕп шкулĕн учителĕсем Е.Ильинăпа Г.Лукиянова 5-мĕш класра вĕренекенсемпе В.Енĕш çырнă “Çĕр тĕрекĕ” калавĕ тăрăх урок ирттерчĕç. Палтиел вăтам шкулĕн вĕрентекенĕ З.Свеклова 9-мĕш классемпе С.Баранова çырнă “Çăкăр хакĕ” калава пăхса тухрĕç. 11-мĕш класра вĕренекенсем Пуянкасси тĕп шкул учителĕ Л.Краснова ертсе пынипе Шăмăршă районĕн паллă çĕр ĕçченĕсемпе паллашрĕç, презентаци йĕркелерĕç. Тата ытти педагогсем те хăйсен ăсталăхне кăтартрĕç.
Шăмăршă районĕнчи чăваш чĕлхипе литературине вĕрентекенсен методисчĕ Г.Иванова уçă урок ирттернĕ учительсене Тав хучĕсем парса чысларĕ. Килнĕ хăнасем çак мероприятин усси пысăкки пирки каларĕç. Патăрьел район райадминистрацийĕн вĕрентÿ пайĕн методисчĕ В.Алексеева фестиваль пысăк шайра иртнине палăртрĕ, малашне те виçĕ район туслă çыхăну тытмалли пирки сăмах хускатрĕ. С.КУЛАКОВА.