28 марта 2009 г.
Черетлĕ класс сехетĕнче эпир районта тухса тăракан “Авангард” хаçат çинчен калаçрăмăр. Тĕрĕссипе каласан, хăшĕ-пĕри ăна пĕрре те вуласа курман иккен. Патăрьел район хаçачĕ унччен “Паянхи сас” ятлă пулнине, вăл 1931 çулхи нарăсăн 8-мĕшĕнче тухма пуçланине пĕлтĕмĕр.
Н.Кошелева класс ертÿçипе эпир нарăсăн 26 тата 28-мĕшĕсенче пичетленсе тухнă номерсене малтан пуçласа вĕçне çитиччен пăхса тухрăмăр.
“Ахрăм” рубрикăра мĕн çинчен кăна çырмаççĕ иккен! Пирĕн шкулти обществознани учителĕ В.Мурзакаев Туçари вĕрентÿ центрĕнче иртнĕ конкурсра призер пулнине вуласа пĕлтĕмĕр. Çакăнтах “Айхи вулавĕсем” конкурс çинчен те çырнă. Унта пирĕн шкулти М.Самделова 2-мĕш вырăн йышăнса килчĕ.
Пĕрремĕш страницăра Н.Тельцов кăтартуллă çемьесене палăртмалли пирки пĕлтернĕ. Пирĕн ял тăрăхĕнче ун пеккисем, чăнахах та, нумай çав.
Иккĕмĕш страницăра Чăваш Енре мĕн пулса иртнине йăлтах пĕрле сÿтсе яврăмăр.
Пирĕн пĕрремĕш вĕрентекен Л.Фроловăн тата 3-мĕш классене вĕрентекен Л.Тимошкинăн уçă урокĕсем çинчен вуласа савăнтăмăр. “Кивĕ сăн ÿкерчĕк” конкурс çинчен пире Надежда Васильевна ăнлантарса пачĕ. Киле çитсенех аслисене пĕлтерме шухăшларăмăр ун пирки.
Пĕр класра вĕренекен Л.Антоновăпа Е.Зотова заметкисем пире уйрăмах кăсăклантарчĕç. Хăйсен хушамачĕсене курсан мĕн тери хĕпĕртерĕç ачасем! Çавăн пекех юлашки страницăпа та тĕплĕн паллашрăмăр эпир.
Çĕнĕ Ахпÿртри В.Люкин хатĕрленĕ сăмахкаçмăша пĕр-пĕринпе ăмăртсах тупрăмăр. Чи маттурри пирĕнтен А.Кадушкин пулчĕ. Эпĕ, Сергейпа Катя 2 тата 3-мĕш вырăнсене йышăнтăмăр.
Пирĕн “Авангард” хаçата çырăнас килсе кайрĕ, ачасенчен чылайăшĕн унта заметкăсем çырас шухăш çуралчĕ.
С.АЛБУТКИН,
Е.ЗОТОВА.
Аслă Чемен.