28 марта 2009 г.
Чăваш Республикинчи професси училищисенче вĕренекенсен 26-мĕш спартакиадин программипе килĕшÿллĕн арçын ачасем хушшинче волейболла выляса мала тухмалли ăмăртăвăн финалĕ иртрĕ.
Маларах тĕл пулусем зонăсенче пычĕç. Канашри 2-мĕш тата 16-мĕш, Вăрнарти 29-мĕш професси училищисен командисене парăнтарса Патăрьелĕнчи 7-мĕш профучилище команди финала тухма пултарнăччĕ.
Финалта вылякансем Шупашкарти 23-мĕш профучилищĕре тупăшрĕç. Унта Çĕнĕ Шупашкарти 15-мĕш, Шупашкарти 23-мĕш, Патăрьелĕнчи 7-мĕш профучилищĕсен командисем пулчĕç. Çивĕч кĕрешÿре Патăрьелсен команди виççĕмĕш вырăна çĕнсе илчĕ. Училище чысне Руслан Багманов, Алексей Медведев, Владимир Зорин, Евгений Майоров, Юрий Пласкин, Дмитрий Маршев, Александр Николаев, Эдуард Салмин вĕренекенсем хÿтĕлерĕç.
Юлашки тăватă çул хушшинче Патăрьелĕнчи 7-мĕш профучилище команди яланах призерсен шутне кĕрсе пычĕ. Командăна ЧР тава тивĕçлĕ учителĕ В.Волков хатĕрленĕ. Вăлах училищĕри волейбол секцине те ертсе пырать. Унăн вĕренекенĕсенчен Максим Кириллов, Александр Иванов, Руслан Багманов тата Алексей Медведев районăн пĕрлештернĕ командинче те выляççĕ.
Н.КРАСНОВ.