01 апреля 2009 г.
Район администрацийĕн структура подразделени-йĕсен ертÿçисен канашлăвĕнче кăçалхи пĕрремĕш кварталти ĕçе пĕтĕмлетнĕ, малашнехи тĕллевсене палăртнă.
Çурхи уй-хир ĕçĕсем çывхарса килнĕ май хуçалăхсем çак яваплă тапхăра мĕнле хатĕрленнипе кăсăкланса ял хуçалăх предприятийĕсен ертÿçисен канашлăвĕсене ирттернĕ, агрономсен конференцине йĕркеленĕ.
Çĕр ĕçченĕн çулталăкĕ культурăллă мероприятисемпе те пуян. Пĕрремĕш кварталта çамрăк çемьесен клубĕсемпе социаллă видеороликсен конкурсĕсем, “Çулталăкри чи вуланакан кĕнеке”, “Çамрăксен вĕрентÿçи”, “Чи лайăх социаллă работник” конкурссем, “Çамрăксем сывă пурнăç йĕркишĕн” акци тата ытти иртнĕ. Хамăрăн хисеплĕ ентеш-çыравçăсем Г. Айхи, А. Талвир ячĕсемпе творчество каçĕсене йĕркеленĕ. Алексей Талвир çĕр çул тултарнине халалласа кăçалхи çулталăка районта “Талвир çулталăкĕ” тесе палăртнă.
Кăçалхи январьтен пуçласа районта кашни уйăхра вырăнти ял тăрăхĕсене тухса хăй тытăмлăх пуçлăхĕн кунне ирттересси, район пуçлăхĕ тĕрлĕ сфера представителĕсемпе тĕл пулу йĕркелесси йăлана кĕнĕ. Канашлура район пуçлăхĕ Н. Глухов туса ирттернĕ ĕçсене кĕскен пĕтĕмлетнĕ, малашнехи ыйтусене çивĕчлетнĕ.