Публикации » Ветерансен йышĕ ÿснĕ

04 апреля 2009 г.

Чăваш Республикин Министрсен Кабинечĕн хушăвĕпе килĕшÿллĕн районти 31 çынна “Ĕç ветеранĕ” тата виççĕшне “Чăваш Республикин ĕç ветеранĕ” ятсене панă. Çак майпа вĕсене район пуçлăхĕ Н. Глухов саламланă. Социаллă хÿтлĕх пайĕн заведующийĕ Ф. Майорова ĕç ветеранĕсене тивĕçекен çăмăллăхсемпе паллаштарнă.

Удостоверени илнисем хушшинче чăннипех те тивĕçлĕ çынсем. Акă, В. Чернова Раççей хисеплĕ донорĕ шутланать. Вăл 48 хутчен юн панă. Вера Алексеевна Татмăшри шкул-садра пуçламăш классене вĕрентет. Пĕтĕмĕшле ĕç стажĕ 35 çултан та иртет.

Патăрьелĕнчи Р. Медведева ветеринари ĕçченне те тивĕçнĕ хисеп. Раиса Венегдитовна 25 çул “Батыревский” хуçалăхра çак ĕçпе вăй хунă. Халĕ Патăрьелĕнчи улма-çырла питомникĕн ветеринарĕ.

Чăваш АССР-ĕн тава тивĕçлĕ транспорт ĕçченĕ В. Ермошкин вара харăсах икĕ удостоверение тивĕçнĕ. Василий Степанович ĕç стажĕ 43 çулпа танлашать.