04 апреля 2009 г.
Пĕр вăхăтрах ĕçе çитрĕç А.Терентьева, Г.Тазетдинова, Г.Ртыкаева цеха. Пĕри каçран лăкаса хăварнă чустана çăрма пикенчĕ. Тепри кукăль ăшĕсем хатĕрлеме пуçăнчĕ. Виççĕмĕшĕ плитасене хĕртме ячĕ. Кашнийĕн валли ĕç пур. Паяна валли заказ та нумай. Туя çеç 3 çаврака çăкăр пĕçерме ыйтнăччĕ. Вĕтĕ кукăльсене, пиццăсене кăмăлласа туянаççĕ. Кусемсĕр пуçне шкулсене, больницăна, кулинари буфечĕсене вĕри çимĕçпе тивĕçтермелле. Ытларахăшне 8, 9, 10 сехет тĕлне хатĕрлемелле. Чуста хăпарнă çĕре ытти ĕçе вĕçлерĕç ăстасем. Алăран килетех çав. Вĕтĕ кукăльсене унаса хунине куç вĕçĕпе те пăхса ĕлкĕрейместĕн. Патнус çине патнус хушăнсах пырать. Çемçе çимĕçе сĕтел çине хуриччен ура тупанне çĕре тивертмесĕр ĕçлемелле çав. Технологине çирĕп пăхăнмалла.
Кун пуçласа вĕçленнине те сисмеççĕ Патăрьелĕнчи “Нива” столовăй çумĕнчи кондитерсем. Пĕр çаврăм ĕçе тирпейленĕ хыççăн çеç сăмах-юмаха пуçлаççĕ хăйсем. Пĕр çемьери пекех-çке. 7 кун ирпе ирех килеççĕ те каçсăр киле каяймаççĕ. Юрать килĕсенче шанчăк пур. Ачи-пăчи ÿссе çитĕннĕ. Çемьерисем пирки канашламалли тупăнатех вара. Хуйхине те, савăнăçне те пĕрле пайлаççĕ Гелине Хайретдиновна, Антонина Алексеевна, Гельсине Абейдиновна. Г.Ртыкаевăпа А.Терентьева цехра ĕçлеме пуçлани 40 çула яхăн.
– Шкул хыççăнах ĕмĕтленнĕ ĕмĕте пурнăçлас тĕллев тытрăм. Райпо çумĕнче продавецсене вĕрентсе хатĕрлекен курса çÿрерĕм. Унтан повар çумне ученик пулса ячĕç. Кайран кондитера куçрăм. Ĕçĕм килĕшет. Ахальтен çакăн чухлĕ вăй хумастăп та ĕнтĕ. Ĕç кĕнекине те алла тытса курман, – вĕсен калаçăвне хутшăннă май ман ыйтăва хуравлать Гелине Хайретдиновна.
Çак хушăра обществăлла апатлану предприятийĕн темиçе ертÿçипе те ĕçлеме тÿр килнĕ кондитерсене. Пурте хăйсене ăнланнишĕн хĕпĕртеççĕ. Цех ĕçĕпе кăмăлсăр пулса сăмах тивмен вĕсене ертÿçĕсенчен. Халĕ те çавах.
– Шухăшпа çурт та лартатпăр, хĕр те качча паратпăр, ывăл та авлантаратпăр эпир. Хамăр ĕмĕтленнисем пурнăçлансах пыраççĕ. Пĕрин хуйхине тепринпе пайланăран чĕрери “чулсене” илсе ывăтатпăр. Гельсине Абейдиновнан килĕнтешĕсем те маттур. Пĕр çăвартан пурăнаççĕ, – сăмах хушать А.Терентьева.
Ĕç пурри çынна çунат хушать. Çакна çирĕплетесшĕн пулчĕ ĕнтĕ Антонина Алексеевна. Пурнăçра кашниех çĕр çине ырă йĕр хăварма тăрăшаççĕ. Вĕсем мăшăрĕпе виçĕ ача çитĕнтереççĕ. Гельсине Абейдиновнăн ăрăва малалла тăсаканĕ пиллĕкмĕш класра вĕренет. Хĕр ачи – Ульяновскри строительство техникумĕнче. Ртыкаевсен вара 5 ача. Хĕрĕсене качча парса çынна юрăхлă тунă. Мăнуксемлĕ. Апла пулин те Гелине Хайретдиновна ĕçрен правур-ха. 1973 çултанпа кондитер цехĕнче смена ертÿçи пулса ĕçлет. Илнĕ заказсене вăхăтра пурнăçлассишĕн тăрăшать.
– Халь çынсем ансата кайрĕç. Туй-çăнăхта тумалла пулсан тÿрех кунта килеççĕ. Юбилей е черетлĕ çуралнă кун, каллех цехра заказ параççĕ. Хулара вĕренекен ачисем валли кукăль-булка туянса парса яракан та йышлă. Пĕçерсе çеç ĕлкĕрмелле, – теççĕ ăстасем.
Кун каçа темиçе патнус пиçсе тухать духовкăран. Пухса пырас пулсан та сăрт купаланмалла. Анчах пурте çийĕнчех ăсанаççĕ вĕсем. Халăх кăмăлне каймалла пĕçереççĕ. Кукăль ăшĕсене тĕрлĕ тăваççĕ. Семинар-канашлу, уяв ячĕпе ирттерекен мероприятисене илсе кайса сутаççĕ. Выставкăсене сахал мар хутшăнаççĕ. Çавна пулах чыс-хисепе çĕнсе илеççĕ. Г.Ртыкаеван “Ĕç ветеранĕ” медаль пур. Ыттисене район администрацийĕн, райпон, “Чăвашпотребсоюз” правленийĕн Хисеп грамотисем тивĕçнĕ. Телейлĕ çынсем тесе калас килет вĕсене, мĕншĕн тесен çĕнĕ куна чун-чĕререн савса кĕтсе илеççĕ. Кăвак тÿпери сар хĕвелĕн çути кондитер цехĕнчи кантăкран кĕрсе ĕçлес туйăма ÿстерет.
А.АСТРАХАНЦЕВА.