08 апреля 2009 г.
Çыннăн йăх-несĕлĕн пуçламăшĕпе унăн пĕтĕмĕшле çулне палăртма йывăр. Пурнăçра пĕр ăрăва тепри улăштарать, хушаматсем, пурăнмалли вырăнсем урăхланаççĕ. Çавăнпа чылай чухне мăнуксем те хăйсен аслă ăрури тăванĕсене лайăх пĕлмеççĕ. Енчен те çак ĕçсене кашни çемьере вăхăтра та тирпейлĕ пурнăçласа пырсан, çамрăк ăрушăн çакă питĕ пысăк пĕлтерĕшлĕ парне пулĕ.
Пилĕк çул каялла эпĕ Чăваш Наци Конгресĕнче Патăрьел ентешлĕхĕн ячĕпе йăх-несĕлĕн схемин конкурсне йĕркелес пирки тухса калаçрăм. Çак шухăш маншăн ăнăçлă та, вырăнлă та пулчĕ. Конкурса хутшăнса эпĕ республикăра пĕрремĕш вырăн йышăнтăм. Çав майпа эпĕ Чăваш Республикин Президенчĕн йышăнăвĕпе килĕшÿллĕн йăх-несĕле тĕпчес ĕçре пысăк ăнăçу тунăшăн Тав хутне илме тивĕçрĕм. Иккĕмĕш вырăнта В.Марков (Шупашкар) тата В.Николаев (Çĕрпÿ районĕ), виççĕмĕшĕнче З.Денисова (Шупашкар), В.Зотов (С.Петербург) тата пирĕн районти Туçа ялĕнчи Г.Мулюков. Малашне кашни пилĕк çулта йăх-несĕл ыйтăвĕпе йĕркелекен конкурс анлăрах та пуянрах та пуласса шанас килет.
В.ТАБАКОВ,
медицина наукисен кандидачĕ,Чăваш халăх
Академийĕн генеалоги секцийĕн председателĕ.