11 апреля 2009 г.
Кăçал районĕпе пĕрчĕллĕ тата пăрçа йышши культурăсене 13 пин те 619 гектар çитĕнтерме палăртнă. Ку вăл пĕлтĕрхинчен 2,5 пин гектар ытларах. Çĕр улмине те иртнĕ çулхинчен 290 гектар нумайрах планланă. Ытти культурăсенчен: сахăр кăшманĕ – 53, пахча çимĕç – 48, сухан-севок – 41, куккурус – 124, тымар-çимĕç – 31, пĕр çул ÿсекен курăксем 2403 гектар йышăнмалла.
Акнă вăрлăхсем пысăк тухăç паччăр тесен, минераллă удобренисемпе те усă курмалла. Акă, пĕрчĕллĕ тата пăрçа йышши культурăсене пĕр гектар пуçне – 2, çĕр улмине 4 центнер удобрени сапмалла. Хальлĕхе 2 пин тонна пур: 2008 çулхипе танлаштарсан 400 тонна нумайрах турттарса килнĕ.
Акана хутшăнакан техникăн 70-95 проценчĕ ĕçе тухма хатĕр. Яваплă тапхăрта харăсах темиçе ĕç тăвакан агрегат – 10, акакан “Кузбасс” комплекс, БДМ дискатор – 18, виçĕ сеялкăллă агрегат – 25, икĕ сеялкăллă агрегат – 18, сÿрекен агрегат – 38, культивацилекен агрегат – 45, минераллă удобрени сапаканни – 35, сирпĕтекен агрегат 31 хутшăнмалла.
Пĕлтĕр ку вăхăтра пĕрчĕллĕ культурăсене акма тухнăччĕ. Кăçал, çанталăк условийĕсене пула, çук. Хальхи вăхăтра кĕрхи культурăсене апатлантарассипе тимлеме тытăннă. “Первомайск”, “Малалла”, “Труд”, “Красное знамя” хуçалăхсенче, улма-çырла питомникĕнче ку ĕçе пуçăннă, 635 гектар çинче пурнăçланă. «Первомайск» кооперативра нумай çул ÿсекен курăксене те апатлантарма тухнă. «Батыревский» тата «Красное знамя» хуçалăхсенче тĕш-тырă вăрлăхĕсене имçамлама пуçăннă. «Первомайск», «Батыревский», «Исток», Ленин ячĕллĕ хуçалăхсенче çĕр улми вăрлăхне яровизацине кăлараççĕ. О.ПАВЛОВА.