15 апреля 2009 г.
Нăрваш Шăхалĕнчи Культура çуртĕнче Валентина Николаевна тата Александр Николаевич Ягуповсене асăнса районти шкул ачисен хушшинче ирĕклĕ майпа кĕрешессипе ăмăрту иртрĕ. Ягуповсем районăн пĕрлештернĕ командинче республика шайĕнчи ăмăртусене йĕлтĕрпе, çуран тата велосипедпа чупса хутшăннă. Çак спорт енĕсемпе вĕсем – район чемпионĕсем. Унсăр пуçне Александр Николаевич ирĕклĕ майпа кĕрешес енĕпе те район чемпионĕ пулнă.
Çамрăк кĕрешÿçĕсем хăйсен виçине тĕрĕсленĕ хыççăн парада тăчĕç. Вĕсене Нăрваш Шăхаль ял тăрăхĕн пуçлăхĕ Н. Яковлев, ĕçпе спорт ветеранĕ В. Бородкин, Сашăн куккăшĕсем Олег, Игорь, Вячеслав Кудряшовсем, Валентинăн аппăшĕ Лидия Николаевна тата Валентинăпа Саша, хĕрĕ Виктория Александровна ăшă сăмахсемпе саламларĕç.
Кĕрешÿçĕсен кавирне сцена çине сарнипе куракансене питĕ те меллĕ пулчĕ. Малтан çăмăл виçери кĕрешÿçĕсем тупăшрĕç. Çак пĕчĕк хĕр ачасем кĕрешÿ мелĕсене самаях пĕлни пурне те тĕлĕнтерчĕ. Ишлĕри И. Смирновăна нихăшĕ те парăнтараймарĕç. Вăл турнирăн чемпионки пулса тăчĕ. Иккĕмĕшпе виççĕмĕш вырăнсенче Н. Никандровăпа Л. Николаева. 30 кг виçеллисен хушшинче чи пултарулли Первомайски хĕрĕ М. Щукина пулчĕ. Тепĕр виçере тата çивĕчрех тытăçусем пычĕç. Чемпионка ятне вара А. Краснова (Ишлĕ) çĕнсе илчĕ. Иккĕмĕш вырăнта – кавир хуçи Н.Шайманова, виççĕмĕшĕнче – К. Чашкина (Хирти Пикшик шкулĕ).
40 кг ытларах виçере пиллĕкĕн çĕнтерÿçĕ ятне илессишĕн кĕрешрĕç. Кунтах Н. Шăхаль хĕрĕсем А. Сухаревăпа Ю. Ермолаева та. Куракансем, паллах, вĕсем мала тухчăр тесе хавхалантарчĕç. Уйрăмах хумхантармалли тытăçу И. Клементьевăпа (Первомайски) Ю. Ермолаева хушшинче иртрĕ. Вĕсем пĕр-пĕринчен балл хыççăн балл илсе пычĕç. Юлашки самантра Юля ăнăçлăрах меслетпе кĕрешсе турнирăн çĕнтерÿçи пулса тăчĕ. Иккĕмĕшпе виççĕмĕш вырăнсене Первомайски хĕрĕсем И. Клементьевăпа Т. Кондратьева йышăнчĕç.
Арçын ачасем 28 кг виçеллĕ кĕрешÿçĕсенчен ăмăртма тытăнчĕç. Çивĕч кĕрешÿре чемпион ятне А. Данилов (Пикшик шкулĕ) çĕнсе илчĕ. Иккĕмĕш вырăнта та çак шкулти А. Чашкин. Виççĕмĕшĕнче тÿрех иккĕн: В. Шаймановпа (Шăхаль) К. Нестеров (Çĕньял). Тепĕр виçери кĕрешÿçĕсенчен чи пултарулли И. Бородкин (Пикшик шкулĕ) пулчĕ. Иккĕмĕш вырăнта А. Саймуков (Патăрьел). Виççĕмĕшĕнче каллех иккĕн: А. Яковлевпа (Н. Шăхаль) С. Мезетов (Пикшик шкулĕ). 35 кг виçеллисем улттăн тупăшрĕç. Чи вăйли кунта А. Смирнов (Ишлĕ). Иккĕмĕш вырăнта Ф. Анюров (Сăкăт), виççĕмĕшĕнче каллех иккĕн: А. Раськин (Н.Шăхаль) тата С. Селиванов (Патăрьел). 40 кг виçеллисенчен çĕнтерÿçĕ ятне Н. Макаров (Çĕньял) тивĕçрĕ. Иккĕмĕш вырăнта А. Чашкин (Пикшик шкулĕ), виççĕмĕшĕнче Н. Селиванов (Патăрьел).
Тепĕр виçере тăхăр кĕрешÿçĕ тупăшрĕ. Чи пултарулли кунта А.Макеев (Пикшик шкулĕ). Иккĕмĕш вырăна С. Желобов (Пикшик шкулĕ), виççĕмĕшне çак шкулти А. Селивановпа Е. Кошкин йышăнчĕç. 50 кг виçеллĕ кĕрешÿçĕсенчен чи вăйли С. Гусаров (Сăкăт) пулчĕ. Иккĕмĕшпе виççĕмĕшсенче Ю. Петровпа (Пикшик шкулĕ) А. Верликов (Первомайски).
Тепĕр виçере халăх кавир çине А. Адикин тухасса чăтăмсăррăн кĕтрĕ. Алексей юлашки çулсенче республика чемпионĕн ятне те темиçе хутчен çĕнсе илчĕ. Самара хулинче республика чысне те хÿтĕлерĕ. Вăл – спорт мастерĕн кандидачĕ. Çак ăмăртура та ятне ямарĕ, пуринчен те выляса илсе куракансене савăнтарчĕ. “Чи лайăх кĕрешекен” ята çĕнсе илчĕ. Иккĕмĕш вырăнта А. Петров (Пикшик шкулĕ), виççĕмĕшĕнче те çак шкулти А. Филиппов.
Тепĕр виçере пурне те çĕнтерсе чемпион ятне И. Куприянов (Çĕньял) тивĕçрĕ. Иккĕмĕшĕнче Ф. Моисеев (Патăрьел), виççĕмĕшĕнче Н. Мухин (Пикшик шкулĕ).
60 кг виçерен йывăртарах категорире пиллĕкĕн тупăшрĕç. Турнирăн çĕнтерÿçи А. Семенов (Патăрьел) пулса тăчĕ. Иккĕмĕш вырăнта А. Лаврентьев (Н. Шăхаль), виççĕмĕшĕнче Ю. Елимов (Çĕньял).
Турнира пурĕ 70-е яхăн çамрăк хутшăнчĕ. Малашне ăна кашни çулах ирттерме калаçса татăлчĕç.
В. БОРОДКИН.