15 апреля 2009 г.
Сывă пурнăç йĕркине тытса пыракан çамрăксем киревсĕр йăла-йĕркене хирĕçлеме пултараççех. Вĕсем ĕçрен пушă вăхăта та спортзалсенче ирттерме тăрăшаççĕ. Кĕрлĕ-çурлă çанталăкра вара ытларах волейбол вăййи илĕртет. Шăпах çакăн чухне йĕркелеççĕ çулленех В. Козлов ячĕллĕ турнира Туçа енче. Кăçал та çапла пулчĕ. Унта 4 команда хутшăнчĕ. Кубокшăн Туçа ял тăрăхĕнчен, Комсомольски районĕнчи Нĕркеç, Елчĕкри Курнавăш ялĕсенчен, Канаш хулинчен çамрăксем ăмăртăва тухрĕç. Вăйăсем Туçари вĕрентÿ центрĕн спортзалĕнче иртрĕç. Хуçасен командинче Анатолий, Валерий, Николай Кошкинсем, Федор Марков, Николай Рыбкин, Николай Сеприханов, Алексей Логунов, Николай Нурсов вылярĕç. Тĕрлĕ ялтан пулсан та кашнийĕшĕ çак шкулта вĕренсе алла аттестат илнĕ.
Кăçалхипе вăйă тăххăрмĕш хут иртрĕ. Нĕркеçсемпе Курнавăшсем пĕлтĕр те хутшăннăччĕ турнира. Чăн-чăн спорт пиçĕхнисене çеç юратать çав. В. Козлов хăй те çав шутах кĕрет. Физкультура учителĕнче 30 çул ытла ĕçлет вăл. Çак хушăра сахал мар ăста спортсмен хатĕрленĕ. Вĕсенчен унăн профессине малалла тăсакансем те пур. Спорт мастерĕн нормативĕсене тултарнисем миçен-ши тата. Василий Владимирович хăй те хутшăнчĕ вăййа.
Турнир вĕçĕ яланах интереслĕ. Çĕнтерÿçĕсене чыслани те кăмăллă. Кубока ку хутĕнче Канаш спортсменĕсем тивĕçрĕç. Çак ятпа вĕсене, турнира хутшăннисене, Туçа ял тăрăхĕн пуçлăхĕ Н. Перепелкин, районти вĕрентÿ пайĕн специалисчĕ Ю. Васюткин, Туçари вĕрентÿ центрĕн ертÿçи П. Шашкин, кубок хуçи В. Козлов саламларĕç. Кашни команда Хисеп грамотине тивĕçрĕ. Вăййа хутшăнакансене парне кÿме те пултарчĕ Василий Владимирович. Ку енĕпе ăна “Тойси” ял хуçалăх кооперативĕн ертÿçи Г.И. Рубцов, “Звезда” ял хуçалăх кооперативĕн ертÿçи В.Л. Кузнецов, Туçа ял тăрăхĕн администрацийĕн пуçлăхĕ Н.А. Перепелкин, А.М. Кошкин, П.В. Мулюков, А.А. Логунов, В.Г. Свинцов, пĕрле ĕçлекенсем пулăшрĕç. Поварсем вĕри чейпе сăйларĕç. Çакăншăн тав тăвать вĕсене В. Козлов.
Вăййа курма кăмăллакансем те йышлăн пухăннă. Вылякансен шутĕнче спорт ветеранĕсем пур. Йăлана кĕнĕ турнир вăй илсех пырать. Малашне ăна шкул ачисем хушшинче ирттерессине йĕркелесен те вырăнлă пулĕччĕ.
А.АСТРАХАНЦЕВА.