15 апреля 2009 г.
Райадминистрацин структура подразделенийĕсен ертÿçисен черетлĕ канашлăвне район пуçлăхĕн çумĕ – АПК предприятийĕсемпе хутшăнусем йĕркелекен пай начальникĕ М. Калмыков ирттернĕ.
Канашлура Республика кунне Патăрьелĕнче ирттерес тĕлĕшпе район пуçлăхĕ Н. Глухов лартнă тĕллевсене пурнăçласа пырас тĕлĕшпе тимлĕхе ÿстермелли пирки çивĕч калаçу пулнă. Çавна май пурăнмалли çуртсене тĕпрен юсас пирки паянах çине тăрса вăй хумалла, мĕншĕн тесен ĕç калăпăшĕ пысăк.
Шкулсенче, культура учрежденийĕсене Н.В. Гоголь çуралнăранпа 200 çул çитнĕ ятпа, ытти уявсен ячĕпе тĕрлĕ мероприяти чылай иртнĕ.
Халăха ĕçпе тивĕçтерес тĕллевпе ял тăрăхĕсем ра-йонти ĕçпе тивĕçтерекен центрпа килĕшÿсем тунă. Çакă Чăваш Республикин ку ыйтупа йышăннă программине пурнăçлама май памалла. Ĕçлев рынокĕнчи хĕрÿ лару-тăрăва çăмăллатас енĕпе куллен тăрăшмаллине палăртнă канашлура.
Çакăнтах районăн тата ял тăрăхĕсен пĕрремĕш кварталти бюджечĕсене пурнăçланин малтанхи итогĕсене пăхса тухнă. Ырă улшăнусемпе пĕрлех кăлтăксене те палăртнă.
Канашлура хутса ăшăтмалли тапхăра ăнăçлă вĕçлес, культура тата спорт мероприятийĕсене çÿллĕ шайра ирттерес, строительство ĕçĕсене вăйлатас, ялсене тирпей-илем кĕртес ыйтусене те туллин хускатнă. Паянхи чи кирлĕ ĕç вара – çурхи уй-хир ĕçĕсене кĕске вăхăтра, пысăк пахалăхпа вĕçлесе кăçалхи тухăçăн çирĕп никĕсне хывса хăварасси тесе палăртнă канашлура.