18 апреля 2009 г.
Районти çырăнтару керменĕнче чыслă лару-тăрура 150-мĕш ача çуралнине шута илнĕ. Виктория Çĕнĕ Ахпÿртри Каштановсен иккĕмĕш ачи. Татьяна Витальевна ялти шкулта пуçламăш класс ачисене вĕрентет. Лев Иванович “Новый мир” фирмăра ĕçлет. Йăмăкне килте 11 çулхи Виктор чăтăмсăррăн кĕтет.
Çемьен виçесĕр савăнăçне пайласа ЗАГС пайĕн начальникĕ О. Гусарова ашшĕне хĕр ачан пĕрремĕш документне – çурални çинчен свидетельство панă.
Район пуçлăхĕн саламне тата хаклă парнене райадминистрацин йĕркелÿпе тĕрĕслев тата кадрсемпе ĕçлекен пай начальникĕ С. Торговцев çитернĕ. Каштановсене телей, сывлăх, çемье йышне малашне те хушма ăнăçу суннă.
Çĕнĕ Ахпÿрт ял тăрăхĕн пуçлăхĕ В. Краснов Çамрăксен çулталăкĕнче ача çуратасси ÿснине палăртнă, Каштановсене парнепе чысланă.