22 апреля 2009 г.
Мĕнле шавлă та хумхануллă иртетчĕç 1960-1970 çулсенче сакăр яла пĕрлештерсе тăракан “Гвардеец” колхозри ĕçпе юрă тата спорт уявĕсем. Манăн кунта ытларах спорт çинче чарăнса тăрас килет. Колхозра 5 комплексла бригада пулнă. Паллах, пĕчĕкрех ялсене тулли команда тăратма кансĕртерехчĕ. Уяв программи те нумай енлĕччĕ: чупасси-сикессисĕр пуçне юланутпа, велосипедпа ăмăртатчĕç, волейбол, футбол вăййисене кăмăллакансем вăй виçетчĕç. Уйрăмах спорт ветеранĕсен, бригадăри механизаторсен командисем тупăшни интереслĕччĕ.
Пирĕн 3-мĕш бригадăшăн (унта Кивĕ Ахпÿрт, Козловка, Пăлакасси ялĕсем кĕнĕ) команда тăратасси йывăр пулман. Вăл вăхăтра çамрăксем кашни ялтах нумайччĕ. Вĕсене пурне те комсомол организацийĕ пĕрлештерсе тăнă. Тен, çавăнпах пуль, кашнийĕшĕ ответлăха туйса тăрăшнă.
Малалла çырса кайнă май спорта юратакансенчен асра юлнисене асăнса хăварас килет. Унтанпа çур ĕмĕре яхăн иртрĕ, пурне те аса илеймĕп, каçарччăр мана. Тутар Тимешĕнчен Ринатпа Роза Сафинсем, Анат Туçаран Т.Торговцева, З.Долгова, И.Беззубова, Тури Туçаран Г.Нибаев, В.Тинюкова, Г.Лиллин, Вăтаелĕнчен В.Сабаев, Кивĕ Ахпÿртрен Вовăпа Санькка Арлановсем, пĕр тăван Алексейпа Владимир Кошкинсем, тетĕшĕпе шăллĕ Геннадипе Петр Рыбкинсем, пĕр тăван Лиза, Лена, Зоя Салминасем кашни çулах бригада чысне хÿтĕлетчĕç. Çак виçĕ хĕр йĕлтĕр йĕрĕ çинче те харсăрччĕ.
Козловка-Пăлакассинче те спорт тусĕсем чылайччĕ: И.Хитров, пĕр тăван Анатолий, Евгений, Станислав Долговсем, Ю.Волков, Л.Артемьева, В.Кошкина мĕн пултарнă таран ăмăртусене хутшăнатчĕç. Икĕ ял хушшинчи çеремре волейбол, футбол площадкисем пурччĕ, тĕттĕм пуличчен çамрăксем мечĕк хăвалатчĕç. Волейбол чи юратнă вăйă пулса тăчĕ. Каярахпа И.Хитровпа А.Долгов 3 хутчен Чăваш Республикинчи ялти волейболистсен “Урожай” спорт обществин чемпионĕсем пулса тăчĕç. Районта И.Хитров ячĕпе çулсерен волейбол турнирĕ ирттерни хăех пысăк пĕлтерĕшлĕ. Паян та вĕсем çак вăййа пăрахман-ха, ыттисемшĕн тĕслĕх пулса тăраççĕ, çамрăксене ăсталăха вĕрентеççĕ. Йĕлтĕр спорчĕ тата мĕнле хисепреччĕ. Бригадăсен хушшинчи хĕрÿ кĕрешÿре трасса çинче спортсмен характерне кăтартса А.Михайлов, А.Жеребцов, А.Трофимов, С.Арланов, Ю.Волков пысăк çитĕнÿсем кăтартатчĕç.
Халĕ вара урăх самана. Каçсерен мечĕк хăвалакан е хĕл кунĕнче йĕлтĕр сырнă çамрăксем çукпа пĕрех. Ачасем е компьютер “чирĕпе чирленĕ”, е сехечĕ-сехечĕпе телевизор умĕнче вăхăт ирттереççĕ. Çулла вара тĕрлĕрен спорт вăййипе йăпанма меслет çукрах, ашшĕ-амăшĕпе пахчара ĕçлемелле, тымар-çимĕç пăхса çитĕнтермелле. Çапах та спортран сивĕнес марччĕ, сывлăхĕ хамăршăн-çке.
В.ХИТРОВА.