22 апреля 2009 г.
Юрий Алексеевич Гагарин космоса чи малтан вĕçсе хăпарнине халалласа Нăрваш Шăхалĕнчи вăтам шкулта сĕтел çи теннисла выляса ăмăртрĕç. Вăл виçĕ ушкăнпа иртрĕ. Малтан кĕçĕнрех классем тупăшрĕç. Пиллĕкмĕш класри Е. Николаева пĕрремĕш, О. Митрофанова иккĕмĕш, Е. Васильева виççĕмĕш вырăн йышăнчĕç.
Вăтам ушкăнри арçын ачасенчен А. Михайлов çĕнтерчĕ. Унăн класри юлташĕ Ю. Николаев иккĕмĕш вырăнта, Д. Михайлов виççĕмĕшĕнче. Алексейпа Дмитрий – пĕр тăвансем. Теннис вăййинче вĕсемшĕн амăшĕ Татьяна Викторовна тĕслĕх пулса тăрать. Вăл районти чылай теннис турнирĕсенче çĕнтернĕ.
Аслă ушкăнра хăйĕн ăсталăхĕпе А. Кудряшов палăрчĕ, пĕрремĕш вырăн йышăнчĕ. Вăл районта та малтисен шутĕнче. Иккĕмĕш вырăнта В. Григорьев, виççĕмĕшĕнче – А. Айкин.
Шкулта теннис вăййи шанчăклăн малалла аталанни сывлăхшăн усăллă.
В. КУЗЬМИН.