06 мая 2009 г.
Çуркуннепе Ĕç уявĕ Первомайски тăрăхĕшĕн футбол вăййи уçăлнă тапхăр. Çак кун Анат Чакăра çуралса ÿснĕ, Афган вăрçинчен таврăннă хыççăн пиртен вăхăтсăр ĕмĕрлĕхех уйрăлса кайнă Ю. Шурякова асăнса турнир ирттересси йăлана кĕнĕ. Юрăн çывăх юлташĕ Л. Шашкин, пĕрле вĕреннĕ тусĕсем тăрăшнипе, Первомайски ял тăрăхĕ пулăшнипе кăçалхипе вăл тăххăрмĕш хут иртрĕ. Малтанласа икĕ-виçĕ команда çеç хутшăннă пулсан, кăçал 8 команда тупăшрĕ. Пĕри те парăнасшăн мар, ветерансем те çамрăксенчен юлмарĕç. Финала та вĕсемех тухма пултарчĕç. Вăйă пĕр пек шутпа вĕçленнĕ хыççăн çĕнтерÿçĕне пенальти татса пачĕ. Кунта вара юнашар районти Комсомольскинчи 2-мĕш вăтам шкул ачисем ăстарах пулчĕç. Çапла вара кубока Каçалсем тивĕçрĕç.
Çавăн пекех çак кун стадион чăрăшсемпе те “пуянланчĕ”, кашни команда йывăçсем лартрĕ.
Чăвашсен йăлипе хăнасене Арапуçсем хапăл пулчĕç. Спортсменсем çеç мар, кашни кураканах вĕри шÿрпе астиврĕ.
А. КОЗЛОВ.