06 мая 2009 г.
Сăкăтри Каруковсем – ялти сумлă çынсем. Анатолий Михайлович нумайранпа “Красное знамя” хуçалăхра инженер-электрик пулса ĕçлет. Нина Ивановна та кооператив ĕçченĕ. Çĕр ĕçченĕн çулталăкĕ çемье пуçлăхĕшĕн чылайлăха асра юлĕ. Анатолий Михайлович 50 çулхи юбилейне паллă турĕ. Çак ятпа ăна çавра сĕтел хушшинче хуçалăх ертÿçи П. Никифоров саламларĕ, Хисеп грамотипе парне пачĕ. Пĕрле ĕçлекен специалистсем ăшă сăмахсем нумай каларĕç. Çакна тивĕç те юбиляр. Хăйĕн ĕçне тăрăшса туса пырать вăл. Ĕçлĕ пурнăçне тăван хуçалăхрах пуçланă.
Каруевсем çĕр çине ырă йĕр хăвараççĕ. Нина Ивановнăпа Анатолий Михайлович пилĕк ача пăхса çитĕнтереççĕ. Асли ĕçе кÿлĕннĕ. Андрей милицин участокри аслă уполномоченнăйĕ. Иккĕмĕшĕ те çак çулпах кайнă. Николай çар ретĕнче тăнă чухнех ирĕклĕ майпа кĕрешес енĕпе спорт мастерĕн кандидачĕ пулнă. Унти хăнăхăвĕ ăна кулленхи ĕçре пулăшать. Федорпа Михаил – йĕкĕрешсем, шалти ĕçсен министерствин пĕр чаçĕнче службăра тăраççĕ. Хăйсене лайăх енчен çеç кăтартаççĕ. Çакна ашшĕн юбилей кунĕнче тăван киле килнĕ тав çырăвĕ те çирĕплетет.
Каруковсен кĕçĕнни Диана ялти шкулта вĕренет.
Улми йывăççинчен аякка ÿкмест теççĕ. Çак сăмахсене Каруковсемшĕнех каланăн туйăнать. Хăйсен хастарлăхне ачисене куçарса пыраççĕ вĕсем.
(Хамăр корр.).