08 мая 2009 г.
Тăван çĕр-шывăн Аслă вăрçине хутшăннисен шучĕ чаксах пырать. Первомайски ялĕнче те вĕсем пÿрне хуçса шутламалăх çеç пулĕ. Вĕсенчен пĕри – Георгий Иванович Савинов.
Г. Савинов майăн 2-мĕшĕнче 90 çул тултарчĕ. Вăл Аслă Арапуç ялĕнче (халĕ Первомайски) çуралнă. Кунтах вăтам шкул пĕтернĕ. Пĕлÿ шайĕ пысăккине кура Георгий Ивановича шкулта математика вĕрентме хăварнă.
Çулталăк ачасене математика вăрттăнлăхĕсене алла илме пулăшнă хыççăн Г. Савинов Çĕпĕре çул тытнă. Романтика таçта та илсе çитерĕ. Çапла вăл Новосибирск облаçĕнчи пĕр шкулта завучра ĕçлеме пуçланă. Анчах Тăван çĕр-шыва фашистла Германи сĕмсĕррĕн тапăннă хыççăн Георгий Ивановичăн ачасемпе сывпуллашма тивнĕ, ăна çара илнĕ. Тăван çĕр-шывăн Аслă вăрçи вĕçленсен çеç таврăннă вăл тăван Первомайски районне. Салтак тумне те хывса ĕлкĕреймен çамрăк Кивĕ Эйпеçри вăтам шкула учителе вырнаçнă. Вăл вăхăтра Кивĕ Эйпеç Первомайски ра-йонне кĕнĕ, халĕ Улатăр районĕнче.
1946 çулта ăна парти райкомне пропагандистра ĕçлеме илеççĕ. Çулталăкран Первомайски райĕçтăвком председателĕн пĕрремĕш çумĕ пулма уйăрса лартаççĕ. Çакăнтан пуçланнă вара Г. Савиновăн патшалăхăн власть органĕсенчи ĕçĕ-хĕлĕ.
Райĕçтăвком председателĕн пĕрремĕш çумĕнче ĕçленĕ вăхăтра Георгий Иванович партин Горькинчи аслă шкулĕнчен вĕренсе тухнă. 1952 çулта ăна Первомайски райĕçтăвкомĕн председательне суйланă. 1959 çулта района пĕтеричченех тăрăшнă вăл кунта.
Пултаруллă ертÿçе 1960 çулта Шăмăршă райĕçтăвкомĕн председателĕ пулма уйăрса лартнă. Икĕ çул кÿршĕ района аталантарассишĕн тăрăшнă Аслă Арапуç чăвашĕ. 1962 çулта ăна Патăрьел райĕçтăвкомĕн председательне суйланă. Георгий Иванович тăван района аталантарассишĕн, хуçалăхсен, предприятисемпе организацисен экономикине тĕреклетессишĕн нумай вăй хунă. Г. Савинов тирпейлĕхе питĕ хисеплекен çын. Хăй те çынсенчен çавнах ыйтать. Ахальтен мар вăл Патăрьел ялне илемлетессишĕн нумай тăрăшнă. Райцентрта паян кашлакан культурăпа кану паркĕнчи, Ленин проспектĕнчи çÿллĕ те капмар йывăçсем вăл пуçарнипе лартăннă.
1966 çулта Г. Савинова Патăрьел райпотребсоюзĕн председательне суйланă. Тăватă çул ытла вăл районти суту-илÿ тилхепине ăнăçлă тытса пынă. Каярах тăхăр çул хушши патшалăхăн районти тĕп хатĕрлев инспекторĕ пулнă. Тăван çĕр-шыва паха ял хуçалăх продукцийĕ ăсатнине тĕрĕслесе тăрассишĕн яваплă пулнă.
Пенсие тухсан Г. Савинов Шупашкарти 1-мĕш çăкăр заводĕнче гражданла хÿтлĕх инженерĕнче тăрăшнă.
Хăйĕн пархатарлă ĕçĕсемшĕн Георгий Иванович Хĕрлĕ Çăлтăр, 1-мĕш степеньлĕ Отечественнăй вăрçă орденĕсене, нумай медале, икĕ хут Чăваш АССР Аслă Канашĕн Хисеп грамотине тивĕçнĕ. Чăваш АССР Аслă Канашĕн депутатне те суйланнă.
Вăрçă ветеранĕ район юбилейне те килсе сăмах каланăччĕ. Паян та вăл Шупашкарта çамрăксемпе, ентешсемпе тĕл пулсах тăрать, хăйĕн пуян аса илĕвĕсемпе паллаштарать. 90 çул тултарнă ятпа, Аслă Çĕнтерÿ кунĕ ячĕпе килнĕ саламсемпе хăпартланса паллашать.
А.АЛЕКСЕЕВ.