15 мая 2009 г.
Патăрьел районне “Раççей” телеканалăн “Сельский час” программине ÿкерекенсен ушкăнĕ килсе кайрĕ. Хăнасене район пуçлăхĕ Н. Глухов, унăн çумĕсем АПК предприятийĕсемпе хутшăнусем йĕркелекен пай начальникĕ М. Калмыков тата строительствăпа обществăллă инфратытăм аталанăвĕн пайĕн начальникĕ И. Дикин кĕтсе илчĕç. Передача ÿкерекенсене районăн социаллă-экономикăллă аталанăвĕн, малашлăхăн ыйтăвĕсем, наци проекчĕсем мĕнле пурнăçланса пыни кăсăклантарчĕ.
Ÿкерекенсен ушкăнĕ Патăрьелне шывпа тивĕçтермелли объектсене, “Паттăр” физкультурăпа спорт комплексне, район больницин çĕнĕ корпусне, Шăнкăртамри çĕнĕ шкул çуртне çитсе курчĕ. Çавăн пекех Шăнкăртамри Ишмуратовсен, “Исток” çĕр ĕç фирмин ертÿçин А. Илюткинăн çамрăк çем-йисенче пулчĕ. Икĕ çемье те çурт-йĕр çавăрма тĕрлĕ программăпа патшалăх пулăшăвĕ илнĕ.
Хăнасем халĕ тăвакан нумай хутлă пурăнмалли çуртсемпе, социаллă-культурăллă объектсемпе паллашрĕç. Вĕсен юлашки чарăнăвĕ ЧР Президенчĕн Указĕпе килĕшÿллĕн Кĕçĕн Патăрьелĕнче тăвакан урамра пулчĕ.
Чăваш Республикин Министрсен Кабинечĕн Председателĕн çумĕ – Ял хуçалăх министрĕ М. Игнатьев хăнасене республикăри ял хуçалăх аталанăвĕпе паллаштарчĕ, Патăрьел районĕн ÿсĕмĕсене уйрăммăн палăртрĕ.
Телекăларăм 2009 çулхи майăн 23-мĕшĕнче ирхине 7 сехетре «Раççей» телеканалпа эфира тухать.
А. АЛЕКСЕЕВ.