15 мая 2009 г.
Донор кунне йĕркелесси районта йăлана кĕрсе пырать темелле. Кăçал çеç çын пурнăçĕшĕн кар тăракансем тăваттăмĕш хут юн пачĕç. Кăрлачра акци Патăрьелĕнчи тĕп больницăра пуçланчĕ. Нарăс уйăхĕнче Турханти врач амбулаторине юн паракансем тавра ялсенчен те йышлă пуçтарăнчĕç, ака уйăхĕнче Первомайскинчи врач офисĕнче Донор кунне хастар ирттерчĕç.
Çу уйăхĕн 12-мĕшĕнче Кзыл Чишмари пĕтĕмĕшле практика врачĕн офисĕнче юн паракансен черетлĕ кунне йĕркеленĕ. Кзыл Чишма, Алманчă ял тăрăхĕсенче пурăнакансем ырă пуçарăва хапăлласа йышăннă, çак кун 94 çын 38 литр юн панă.