23 мая 2009 г.
Юнкун, çу уйăхĕн 20-мĕшĕнче, районта черетлĕ Пĕрлĕхлĕ информаци кунĕ иртрĕ. Унăн темисем: Николай Федоров Президентăн “Чăваш Республикин 2010-2012 çулсенчи бюджет политикин тĕп çул-йĕрĕ çинчен” иртнĕ уйăхăн 20-мĕшĕнче йышăннă Указне пурнăçлас тĕлĕшпе патшалăх влаçĕпе вырăнти самоуправлени органĕсем умĕнче тăракан задачăсем; хуласемпе поселоксене, ялсене, вăрмансемпе объектсене пушар тухасран хÿтĕлессипе, çавăн пекех муниципаллă тытăмсемпе масарсен территорийĕсене, ял тăрăхĕсенчи çулсене тирпей-илем кĕртес енĕпе тăракан тĕллевсем; “Чăваш Республикин 2009-2011 çулсенче пируспа тата табак изделийĕсемпе усă курассине профилактика тăвасси çинчен” калакан тĕллевлĕ программăна пурнăçламалли мерăсем.
Кун йĕркине лартнă ыйтусене вырăнти халăхпа сÿтсе явма пирĕн районта федераллă пурлăха тытас ĕçĕн федераллă агентствăн Чăваш Республикинчи Территори управлени ертÿçин тивĕçне пурнăçлакан Е. Толстов ертсе пыракан пысăк ушкăн пулчĕ.
Район пуçлăхĕ Н. Глухов Патăрьелсем тĕнче шайĕнче кĕрлекен кризис тапхăрĕнче çÿлерех асăннă ыйтусене мĕнле пурнăçласа пыни çинчен каласа пачĕ. Николай Иванович вăрман хуçалăхĕсен паянхи шăпи пирки питĕ пăшăрханса калаçрĕ. Вăхăтĕнче çак системăра 256 çын ĕçленĕ. Вĕсем кашнийĕшĕ вăрман пуянлăхĕшĕн, кунти пушар хăрушсăрлăхĕшĕн, тирпейшĕн тата ытти те яваплă пулнă. Паян вара çак пысăк ĕç 16 çын çинче.
Район чиккинче вырнаçнă асамлă юмах тĕнчине аса илтерекен Люляра вара пăрчăкан евĕр вĕри те хастар хĕрарăм Л. Борисова вăрман “улпучĕн” тивĕçĕсене пĕр-пĕчченех пурнăçласа пырать.
Пирĕн районта Люля чи пĕчĕк ял. Паян кунта вăтăр çемье пурăнать. Вĕсене пÿрне хутлатса та шутласа тухма пулать, паллах. Анчах вĕсем пĕр тымартан тухнăскерсем евĕр туслă, ăш-пиллĕ, кăмăллă. Аякри “тĕттĕм” текен яла 12 çухрăм çатма евĕр çул сарса панăшăн паян та вĕсем район, республика ертÿçисене тав сăмахĕ калаççĕ.
– Люляра усал çын та, усал шухăшли те çук. Вĕсем пурте ырă, вĕсемпе ĕçлеме те çăмăл. Нумай çул вăрман хуçалăхĕнче ĕçленĕ май, вĕсен ĕçченлĕхне те, хастарлăхне те пĕлетĕп. Çывăх вăхăтрах, ял çумĕнче унччен пулнă пĕвене çĕнетесшĕн. Люля пирĕн районшăн, хăнасемшĕн имлĕ-симлĕ кану кĕтесĕ пултăр, – терĕ район пуçлăхĕ Н. Глухов ялти ватăсене паянхи район пурнăçĕпе паллаштарнă май.
Çавăн пекех информаци кунне “Россельхозбанк” уçă акционерла обществăн Чăваш регионĕнчи филиал директорĕ И. Письменская, Чăваш Республикин Çут çанталăк ресурсĕсен тата экологи министрĕн çумĕ Е. Юшин, ЧР Сывлăха сыхлас тата социаллă аталану министрĕн çумĕ И. Лисенкова, ЧР Патшалăх Канашĕн депутачĕ А. Васильев хутшăнчĕç, тухса калаçрĕç. Республика представителĕсем Чăваш Енре Патăрьел районĕ паянхи йывăрлăха халăхпа пĕрле ăнланса татса пынине асăнчĕç.
Информаци кунĕн иккĕмĕш пайĕнче республика тата район шайĕнчи ушкăнсем вырăнсене тухса ял çыннисемпе курнăçрĕç, вĕсене пăшăрхантаракан ыйтусене хускатрĕç.
Райадминистрацин обществăлла инфратытăм аталанăвĕн тата строительство пайĕн начальникĕ И. Дикин, информаци ушкăнĕн ертÿçи Е. Толстов, ЧР экологи министрĕн çумĕ Е. Юшин чăн малтанах Пикшик ял тăрăхĕн активĕпе, шкул коллективĕпе, врач офисĕн ĕçченĕсемпе тĕл пулса калаçрĕç, вĕсене пăшăрхантаракан ыйтусене хуравларĕç. Ял халăхне ытларах таса шыв, çул пирки вырăнта мĕнле татса пани интереслентерчĕ.
Информаци кунне хутшăннисем Хирти Пикшик ял варринче пулакан пĕвене çитсе курчĕç. Строительство объекчĕ пĕчĕкех мар, вунă миллион ытла ларать. Кăçал кунта 3,4 миллион тенкĕлĕх ĕç тумалла.
– Укçа-тенкĕ енчен çÿлтен чăрмав пулмалла мар. Вырăнта çеç ĕçе ăнăçлă йĕркелеччĕр, – терĕ ЧР экологи министрĕн çумĕ гидротехника сооруженийĕсем пирки калаçăва пĕтĕмлетнĕ май.
А. ЕГОРОВА.