23 мая 2009 г.
Чăваш Республикин Гражданла оборона тата чрезвычайлă лару-тăру енĕпе ĕçлекен патшалăх комитечĕн “Чăваш Республикин пушара хирĕç кĕрешекен служби” патшалăх учрежденийĕ ачасем шăрпăкпа вылянине пула тухнă пушарсенчен сыхланмалли уйăхлăхсене кашни çулах ирттерет. Кăçал та пушар хуралне 360 çул çитнине халалласа шкул ачисем хушшинче алă ăстисен тата калавсемпе сăвăсен конкурсне йĕркелерĕç. Çак конкурса уйрăмах В. Антипов учитель ертсе пынипе Патăрьелĕнчи иккĕмĕш вăтам шкул ачисем хастар хутшăнчĕç. Асăннă шкулта пушар хуралĕн ĕçченĕсем те тăтăшах пулса тăраççĕ, ăнлантару ĕçĕ ирттереççĕ. Вĕренекенсем те вут çулăмпа кĕрешекенсемпе тачă çыхăну тытаççĕ, пушар чаçĕн музейĕнче час-часах пулаççĕ, спорт мероприяти-йĕсене хутшăнаççĕ тата ытти те.
Часах вĕренекенсем çуллахи канăва каяççĕ. Виçĕ уйăх килте пулаççĕ вĕсем. Шăпах çак вăхăтра ачасен айăпĕпе пушар тухас хăрушлăх пысăк. Пĕлтĕр, сăмахран, Çĕньялта çак сăлтавпа инкек пулчĕ. Икĕ шăпăрлан пушă çуртăн лупасĕ айне кĕрсе ларнă та шăрпăк çутмалла вылянă. Юрать-ха, аслисем çакна вăхăтра сиснĕ, çийĕнчех пушар хуралне шăнкăравланă.
Н. СЕЛИВАНОВА, пушар хуралĕн
инструкторĕ.