23 мая 2009 г.
Нăрваш Шăхалĕнчи вунпĕрмĕш класри ушкăнпа тăракан 17 ача çавăрса илнĕ Т. Калашниковăна. Черетлĕ консультаци хыççăн та сăмах пĕтмен пĕрлĕхлĕ патшалăх экзаменне тытма хатĕрленекенсен. Пăхса тухнă темăна килсенче тепĕр хут шĕкĕлчеме сĕнчĕ Татьяна Валериановна.
17 çул класа журнал йăтса кĕрет Т. Калашникова. Тинкерсе пăхакан ачасене пĕлÿ тĕнчипе илсе пырать. Пĕр çак тивĕç çеç мар унăн. Организатор та вăл. Ку енĕпе вара ĕçĕ пайтах.
Шкулти кашни мероприяти Татьяна Валериановнăпа çыхăннă. Аслă классене те, вăтаммисене те, кĕçĕннисене тунсăхлаттарса лартмасть вăл. Çакна тума унăн пултарулăхĕ çитет, Турă пани те пур. Ахальтен мар Калашниковсен ĕç династийĕ ку енĕпе 353 çула çитет. Ĕçе пуçăнаканĕ вара Егор Дмитриевич пулнă. Вăл пуçламăш классене вĕрентнĕ. Вăрманхĕрри Шăхалĕнче заведующи пулнă. Чĕрĕк ĕмĕр педагогика ĕçне кÿлĕнсе “Ĕçри хастарлăхшăн” медаль илнĕ. Виктор Дмитриевич та ĕç стажне çакăн чухлех çитернĕ. Нăрваш Шăхалĕнчи 7 çул вĕренмелли шкул ертÿçинче те ĕçленĕ. Педагогика ĕçне чи нумай кÿлĕнни Егор Дмитриевичăн ывăлĕ Никифор Егорович пулнă. Вăл ялти математика учителĕнче, Именкассинчи тулли мар шкулта 43 çул ĕçленĕ. Ăрăва малалла тăсакан Раиса Викторовна та педагогика анине 33 çул «сухаланă». Раççей Федерацийĕн, Чăваш Республикин тава тивĕçлĕ учителĕсен ятне илнĕ. Халĕ Çĕнĕ Шупашкарта ĕçлекен Геннадий Викторович та çутĕç отличникĕ ятне тивĕçнĕ. Елизавета Ивановна Шăхасанта, Людмила Сергеевна Владимир облаçĕнчи пĕр хулара, Александр Геннадьевич Мускав патшалăх университетĕнче, Лидия Петровна вырăнта ĕçлесе çамрăк ăрăва ти-вĕçлĕ воспитани парассишĕн тăрăшаççĕ. Иван Дмитриевичăн, Матрена Федоровнан, Виталий Викторовичăн та çемье учительсен династине хывнă ĕçре тÿпе пур.
(Хамăр корр).