23 мая 2009 г.
Патăрьел районĕ чапа тухнă спортсменсемпе пуян. Вĕсен шутне тепĕр çынна та кĕртмелле. Вăл – Марат Рашитович Налиба.
Марат 1989 çулта Шăнкăртамра çуралнă. Шкулта чухнех тĕрлĕ меслетпе кĕрешме пикеннĕ. Патăрьел район пуçлăхĕн, Чăваш Республикин Президенчĕн стипендийĕсене илсе тăнă. Пилĕк çул хушши спортри ăсталăхне туптама ăна Ильфак Алеев тренер нумай пулăшнă. Хальхи вăхăтра Марат Чăваш патшалăх университечĕн юридици факультетĕнче вĕренет. Çав вăхăтрах 5-мĕш Олимп резервĕсен училищинче Юрий Алексеев аслă тренер патĕнче тренировкăсем ирттерет.
Çамрăк пулсан та Марат Налибан спортри титулĕсем йышлă. Вăл 15 хутчен районти Акатуй-Сабантуйра така çĕнсе илнĕ (15 хутчен ирĕклĕ майпа тата пиçиххирен тытса кĕрешсе абсолютлă çĕнтерÿçĕ пулнă). Ульяновскра, Аслă Нагаткинра çĕнтернĕ. М. Налиба – ирĕклĕ майпа кĕрешессипе Раççей спорт мастерĕ, армспортпа тата пиçиххинчен тытса кĕрешессипе спорт мастерĕн кандидачĕ, пиçиххирен тытса кĕрешессипе Раççейĕн 2008 çулхи чемпионĕ, ирĕклĕ майпа кĕрешессипе Атăлçи федераллă округĕн, Чăваш Республикин, В.И. Чапаев парнисемшĕн Раççей турнирĕн чемпионĕ. Армспорт енĕпе те Чăваш Республикин чемпионĕ ятне çĕнсе илнĕ.
М. Налибан спортри малашлăхĕ пысăк. Ахальтен мар савăнать, мухтанать хăйĕн вĕренекенĕпе Ильфак Алеев аслă тренер. А. АЛЕКСЕЕВ.