Публикации » Вулавăшра ыркăмăллăх акцийĕ пырать

27 мая 2009 г.

Районти тĕп библиотекăра вулаканпа тăтăшах тĕрлĕрен кăсăклă мероприяти йĕркелеççĕ. Акă, майăн 20-мĕшĕнчен пуçласа июнĕн 20-мĕшĕччен Раççейри библиотека кунне халалласа “Чĕререн чĕре патне” ятпа ырă кăмăллăх акцине ирттереççĕ. Иртнĕ эрнере пĕрремĕш “чĕкеç” Чĕмпĕр облаçĕнченех парнепе çитнĕ. Н. Кондрашкин профессийĕпе ÿнерçĕ, скульптор, публицист, Тутар республикинче Аслă Аттелĕх вăрçинче пуç хунисене лартнă паллă палăксен авторĕ. Вăлах Алексей Талвир ентеш-çыравçăн палăк проекчĕн авторĕ те. Николай Григорьевич районти тĕп библиотекăна хăйĕн кĕнекине парнеленĕ. “Хранительница Руси великой” ятпа пичетленнĕ кĕнекене вăл пăлхар-чăвашри Шорниковсен йăхĕ 300 çул тултарнине халалланă.