30 мая 2009 г.
Пĕтĕмпе 82 яхăн кинофильм кăтартĕç Шупашкарта июнь уйăхĕн 1-6-мĕшĕсенче иртекен Пĕтĕм тĕнчери II кинофестивальте.
– Фестиваль тĕллевĕ – халăхсен хушшинчи хутшăнусене çирĕплетесси, хальхи вăхăтри çăмăл мар лару-тăрура халăхсен культурине сыхласа хăварса малалла аталанма пулăшасси, – каласа парать унăн пултарулăх ертÿçи, Раççей кинематографи искусствисен академийĕн членĕ. РФ кинематографистсен союзĕн премийĕн лауреачĕ Вячеслав Шмыров. – Мĕн пурĕ сакăр программăпа ĕçлĕ уяв. Ача-пăча, илĕртÿпе пĕлÿ, Раççей тата ют çĕр-шывсен кинокартинисен, кĕске фильмсен... программисем.
Киноискусство ăстисен ĕçĕсене “Çĕнтерÿ” асăну комплексĕнче (П.П. Хусанкай ячĕллĕ Культура керменĕ) “Салют”, “Акатуй”, Трактор тăвакансен Культура керменĕсенче, “Çеçпĕл”, “Атăл” (Çĕнĕ Шупашкар), “Мир-Луксор” кинотеатрсенче, ЧР электрон тата кинодокументацисен патшалăх архивĕн кинозалĕнче, Наци библиотекинче курма пулать. Уявра Чăваш Енрен тухнă А. Хван, П. Романов режиссерсен “Дюба-Дюба”, “Последний поезд” фильмĕсене те кăтартма палăртнă. Сумлă хăнасен йышĕнче вара – А. Хван, С. Дружинина, А. Мукасей, В. Бычков, А. Герман-кĕçĕнни, Ю. Грымов, А. Головин, Ю. Бердников, Э. Рязанов, Д. Мороз, А. Петренко, К. Шахназаров тата ытти актерсемпе режиссерсем, сценаристсем – мĕн пурĕ 70 яхăн çăлтăр. П. НИКОЛАЕВ.