30 мая 2009 г.
“Вĕренни – çутă, вĕренменни – тĕттĕм” текен ваттисен сăмахĕ нумай ăрусен чунне кĕнĕ ĕнтĕ. Шкулта вĕренекенсемшĕн те çывăх вĕсем. Çакна Патăрьелĕнчи 1-мĕш вăтам шкулти лайăх вĕренекенсенчен пĕри Кристина Фуражникова та ăша хывнă.
Кристина ку шкулти 8-мĕш класа урăх çĕртен куçса килнĕ. Малтанхи кунсенчех пуçарулăхпа, пĕлÿ-лĕхпе палăрма тытăннă. Класри, шкулти мероприятисене йĕркелеме хастар хутшăннă, халĕ те çавах.
К. Фуражникова лартнă тĕллевсене ăнăçлă пурнăçлама пултарать. Пур предметсемпе те “пиллĕксем” унăн. Уйрăмах акăлчан чĕлхине тата ытти çĕр-шывсем çинчен пĕлме юратать. Акă, Пермьри ăсталăха аталантаракан центр ирттернĕ Пĕтĕм Раççейри “Çамрăксен акăлчан чĕлхин чемпионачĕ” ăмăртăва хутшăнса вăл 8-9-мĕш классенче вĕренекенсем хушшинче районта тата республикăра пĕрремĕш вырăн йышăнчĕ. Чемпионатăн Дипломне тата сертификатне тивĕçрĕ.
Унпа пĕрлех Владимир Макаров, Раиль Ахметов, Анна Николаева, Руслан Шакмаков, Агата Медведева, Кристина Рубцова, Татьяна Тукмакова çитĕнÿсемпе палăрчĕç.
Çак ачасене чемпионата хутшăнма Чăваш Республикин тава тивĕçлĕ учителĕ, аслă категориллĕ вĕрентекен Эвелина Арсентьевна Карягина вĕрентсе хатĕрленĕ. Хăй те тĕрлĕ шайри конкурсра пĕр хутчен мар çĕнтернĕскер, ачасен çитĕнĕвĕсемпе тивĕçлипех савăнать.
А. АЛЕКСЕЕВ.