06 июня 2009 г.
Çак кунсенче райадминистраци çумĕнчи çул çитмен ачасемпе ĕçлекен комиссин черетлĕ ларăвĕ пулнă. Ăна комисси председателĕ район пуçлăхĕн пĕрремĕш çумĕ Р. Селиванов ертсе пынă, ачасене тивĕçлĕ воспитани парассипе çыхăннă ыйтусене çивĕчлетнĕ. Ларура кун пирки пусарса калаçма сăлтавĕ те пулнă. Именкассинчи вăтăр çулхи виçĕ ача амăшĕн çăмăлттайлăхĕ, явапсăрлăхĕ пурне те тĕлĕнтернĕ. Ирĕк пурнăçа хăнăхнăскер пепкисене икĕ эрнене сăнавсăр пăрахнă та хăварнă. Амăшне ачисем мĕн çисе пурăнни, таса кĕпе-тумтирпе çÿрени те интереслентермен курăнать. Ун пек пулмасан пĕринчен тепри пĕчĕк ачасене çапла пăрахса хăвараймăн.
Комисси çамрăк амăшне хăйĕн тивĕçне кирлĕ пек пурнăçламаншăн саккунпа килĕшÿллĕн штраф панă, тĕрĕс çул çине тăрса ачасене кирлĕ пек пăхма çирĕп асăрхаттарнă.