17 июня 2009 г.
Патăрьел район депута-чĕсен Пухăвĕн черетлĕ ХХVII ларăвĕ иртрĕ. Ăна депутатсен Пухăвĕн председателĕ М. Петров уçрĕ, ертсе пычĕ. Депутатсем ĕç йĕркине çирĕплетнĕ хыççăн палăртнă ыйтусене сÿтсе явма пуçларĕç. Кун йĕркинчи ыйтусенчен ытларах пайĕ тĕллевлĕ программăсемпе çыхăннă.
2010-2020 çулсенче Патăрьел районĕнче социаллă пĕлтерĕшлĕ чирсене асăрхаттарасси тата вĕсемпе кĕрешесси çинчен калакан тĕллевлĕ программăпа ларура район больницин тĕп врачĕн çумĕ Н. Надина паллаштарчĕ.
Депутатсем программăна сÿтсе явса тата яланхи комисси панă сĕнÿсене кĕртсе çирĕплетрĕç.
Н. Надина 2010-2020 çулсенче Патăрьел районĕнче наркотикла япаласемпе усă курнине тата вĕсен саккунсăр çаврăнăшне хирĕç кĕрешмелли комплекслă мерăсен тĕллевлĕ программипе те паллаштарчĕ. Депутатсем ăна та йышăнчĕç.
Депутатсен Пухăвĕн ларăвĕнче “2007-2010 çулсенче Чăваш Республикинче физкультурăпа спорта аталантармалли тĕллевлĕ программа” Патăрьел районĕнче мĕнле пурнăçланса пыни çинчен сÿтсе яврĕç. Ку енĕпе лайăх тĕслĕхсене те, кăлтăксене те палăртса тивĕçлĕ йышăну турĕç.
Ларура ытти ыйтусене те пăхса тухрĕç. Вĕсенчен паллăраххисем: нумай хваттерлĕ çуртсене тĕпрен юсамалли программăна, граждансене авариллĕ хваттерсенчен куçармалли программăна улшăнусем кĕртесси çинчен, Анат Туçа, Тутар Тимеш, Кĕçĕн Шăнкăртам ялĕсенче пурăнакансен ыйтăвĕ çинчен тата ытти те. Депутатсем пурин пирки те тивĕçлĕ йышăнусем кăларчĕç.
Лару ĕçне Патăрьел район пуçлăхĕ Н. Глухов, ял тăрăх пуçлăхĕсем, райадминистрацин структура подразделенийĕсен ертÿ-çисем хутшăнчĕç. Н. Глухов сăмах тухса каларĕ, мĕн йышăннине ăнăçлă пурнăçлас тесен тата ытларах вăй хурса ĕçлемеллине палăртрĕ.
А. АЛЕКСЕЕВ.