17 июня 2009 г.
Çулленех районта иртекен Акатуй-Сабантуйра иртнĕ çула тата çурхи ĕçсене пĕтĕмлетрĕç, чи маттуррисене палăртрĕç. Район пуçлăхĕн Н. Глуховăн йышăнăвĕпе килĕшÿллĕн, акана пысăк пахалăхпа пурнăçланă тата 2008 çула экономика тĕлĕшĕнчен тупăшлă вĕçленĕ хуçалăхсене диплом тата ук-çан преми парса хавхалантарма йышăннă.
Çур акине вăхăтра тата пысăк шайра ирттернĕшĕн “Труд” хуçалăх (ертÿçĕ – Н. Михайлов) пĕрремĕш вырăн йышăннă.
Иккĕмĕш вырăнта – “Малалла” ял хуçалăх артелĕ (ертÿçĕ – М. Петров).
Виççĕмĕшĕнче – “Батыревский” хупă акционерла пĕрлешÿ (ертÿçĕ – П. Ялуков).
Ленин ячĕллĕ, “Исток”, “Первомайск”, “Красное знамя”, “Звезда”, “Тойсинская” хуçалăхсем, улма-çырла питомникĕ лайăх ĕçленине палăртнă.
Выльăх-чĕрлĕхрен – чи нумай продукци
Выльăх-чĕрлĕхе лайăх хĕл каçарнăшăн тата пысăк кăтартусемшĕн, хĕллехи вăхăтра 7648 центнер сĕт тата пĕр ĕнерен 4261 килограмм сĕт суса илнĕшĕн Ленин ячĕллĕ агрофирмăн (ертÿçĕ – Ю. Попов) ĕне фермине çĕнтерÿçĕ тесе йышăннă.
“Красное знамя”, “Батыревский”, “Исток” хуçалăхсен фермисене те пысăка хурса хакланă.
Уйрăм выльăх-чĕрлĕх пăхакансем хушшинче çаксене çĕнтерÿçĕсем тесе йышăннă, диплом тата укçан преми парса хавхалантарнă:
“Батыревский” пĕрлешÿри Айсылу Шарафутдинова дояркăна. Вăл пĕр ĕнерен 3139 килограмм сĕт сунă.
“Звезда” хуçалăхри Галина Суркова сысна пăхакана, вăл пĕр тĕп амаран 16,7 çура илнĕ.
“Исток” агрофирмăри Мария Илехметова пăру пăхакана, пĕтĕмĕшле 71 центнер самăртнăшăн. “Красное знамя” хуçалăхри Галина Куракова сысна самăртакана, пĕтĕмĕшле 175 центнер ÿт хуштарнăшăн.
Комисси Л. Раськина (Ленин ячĕллĕ), З. Гусарова (“Красное знамя”), Р. Бородкина (“Батыревский”) дояркăсене, Г. Савельева (“Труд”), И. Мартышкин (“Звезда”), Петр тата Зина Кураковсене (“Красное знамя”) ĕне-выльăх самăртакансене, В. Эриванова (“Труд”), В. Суркова (“Красное знамя”), З. Кузнецова (“Звезда”) сысна çури илекенсене, В. Кошкина (“Батыревский”), Г. Адикина (“Труд”), Н. Кузьмин (“Красное знамя”) пăру ÿстерекенсене ырăпа асăннă.
Ака паттăрĕсем
Çур акинче хастар ĕçленĕ çĕнтерÿçĕ-механизаторсене диплом тата укçан преми пама йышăннă:
“Исток” агрофирма» тулли мар яваплă пĕрлешÿ механизаторне Николай Тихонова. Вăл МТЗ-1221 тракторпа 3 сеялкăллă агрегатпа 953 гектар пĕрчĕллĕ культура акнă.
“Батыревский” хупă акционерла пĕрлешÿ трактористне Валерий Васильева, ДТ-75 тракторпа 2 сеялкăллă агрегатпа пĕрчĕллĕ культура 587 гектар никĕсе хывнă.
“Дуслык” кооператив трактористне Алляметдин Мустафина, ДТ-75 тракторпа 600 гектар çĕр ха-тĕрленĕ.
Ленин ячĕллĕ агрофирмăри Александр Французов механизатора, акара çĕнĕ технологипе усă курса К–701 тракторпа 1313 гектар акнăшăн.
АПК предприятийĕсемпе строительство организацисен, туса хатĕрлекен промышленноçăн 2008 çулхи производствăпа финанс кăтартăвĕсемпе çаксене лайăххисем тесе палăртнă:
Ял хуçалăх предприятийĕсем хушшинче пур тĕп отрасльсене лайăх аталантарнăшăн “Красное знамя” кооператива (ертÿçĕ – П. Никифоров), выльăх-чĕрлĕх отраслĕнче çитĕнÿсем тунăшăн “Звезда” хуçалăха (ертÿçĕ – Л. Кузнецов), ÿсен-тăран отраслĕнчи кăтартусемшĕн “Исток” агрофирмăна (ертÿçĕ – А. Илюткин) палăртнă.
Строительство организацийĕсем хушшинче “Булат” тулли мар яваплă пĕрлешÿ (ертÿçĕ – Р. Абдулвалеев). Вăл строительствăпа монтаж ĕçĕсене 196,8 миллион тенкĕлĕх тунă.
Апат-çимĕç тирпейлекен промышленность предприятийĕсенчен “Вамин-Татарстан” филиалăн Патăрьелĕнчи сĕт-çу завочĕ (ертÿçĕ – Ш. Куликов) тупăшлă ĕçленĕ.