20 июня 2009 г.
Кунĕ хĕвеллĕ те уяр пулчĕ. Çавна май эрнекун ир-ирех «Хĕвеллĕ» уçланкă ачасен ша-вĕпе тулчĕ. Тĕп сцена çумĕнчи стендсем шкулсен ĕçĕ-хĕлне çутатрĕç. Вĕсемпе уява килнисем кăмăлтан паллашрĕç.
Ачасен «Акатуй-Сабантуйĕ» кăçалхипе çиччĕмĕш хут иртрĕ. Вăл Раççей кунĕпе пĕр килчĕ. Çамрăксен çулталăкне халалланăскере район пуçлăхĕ Н. Глухов уçрĕ, саламларĕ. Уяв ялавне хăпартма чи маттуррисем тивĕç пулчĕç.
Районти вĕрентÿ пайĕн пуçлăхĕ В. Осипов Раççей, вăл шутра пирĕн район та çамрăксемпе, çитĕнекен ăрупа пуян пулнине палăртрĕ. Кăçал Юхмапа Пăла тăрăхĕнче тăххăрмĕш класран 564, вунпĕрмĕшĕнчен 379 ача вĕренсе тухрĕç, 36-шĕ ылтăн, 21-шĕ кĕмĕл медале тивĕçеççĕ. 2008-2009 вĕренÿ çулĕнче вара 5386 ача пĕлÿ пухрĕ. Паянхи кун районти 52 муниципаллă вĕрентÿ учрежденийĕнчен 34-шĕ пĕтĕмĕшле пĕлÿ паракан (15 вăтам, 8 тĕп, 11 пуçламăш) шкулсем, 15-шĕ ача сачĕ. Виççĕшĕ хушма пĕлÿ паракан учреждени. Çавăн пекех районта професси училищипе И.Н. Ульянов ячĕллĕ Чăваш патшалăх университечĕн филиалĕ пур.
Чăваш Ен Правительстви Шăнкăртамра Çĕнĕ çула çĕнĕ шкул хута ярса пысăк парне кÿчĕ. Кашни шкултах интернет çыхăнăвĕ пур. Вăтам шкулсенче медиапроекторсемпе электронлă интерактивлă комплекссемпе усă кураççĕ.
Вĕрентÿ учрежденийĕсене ачасене шкул автобусĕсем турттараççĕ.
Районта вăтамран кашни класра 16,8 вĕренекен ăс пухрĕ. 320 учитель класс ертÿçин тивĕçĕсене пурнăçларĕ.
Иртнĕ вĕренÿ çулĕнчи выпускниксен 60 проценчĕ аслă вĕренÿ заведенийĕсене кĕнĕ. Вĕсенчен 63 проценчĕ бюджет никĕсĕ çинче пĕлÿ пухаççĕ. Патшалăхăн пĕрлĕхлĕ экзаменĕсене ăнăçлă тытнăччĕ вĕсем. Ку енĕпе республика шайĕнче саккăрмĕш вырăнта пултăмăр.
Вĕрентÿ учрежденийĕсем, педагогсем Раççей Федерацийĕпе Чăваш Ен Президенчĕсен гранчĕсене çĕнсе илме пултарни савăнтарать.
26 шкулта чăваш чĕлхи тăван чĕлхе шутланать. Çиччĕшĕнче тутар чĕлхи вĕренеççĕ. Ют чĕлхепе иккĕмĕш класран пĕлÿ параççĕ.
Вĕрентÿ системинче 935 педагог ĕçлет. Вĕсенчен 79,4 проценчĕ аслă тата пĕрремĕш категориллĕ.
Кашни шкулта тенĕ пекех спортзалсемпе спорт площадкисем пур.
Д. Иванов (Аслă Чементи вăтам шкул), Г. Гайнуллова (Тутар Сăкăт), И. Краснова (Патăрьелĕнчи пĕрремĕш), Д. Юнусова (Шăнкăртам), Д. Хайбуллова (Тутар Сăкăт), Л. Ахмадеева (Сăкăт) республика олимпиадисен призерĕсем пулчĕç. Вĕсен йышĕ çулсерен ÿсни савăнтарать. Конкурсра, вĕренÿре палăрнисене, олимпиадăра çĕнтернисене Хисеп грамотисемпе дипломсем парса чысларĕç.
Спортпа туслашса, пиçĕхсе ÿсеççĕ шкул ачисем. Çĕнĕ Ахпÿртри пĕтĕмĕшле пĕлÿ паракан шкулти хоккей команди республика чемпионĕ ятне çĕнсе илчĕ.
Ачасен «Акатуй-Сабантуйĕнче» спортпа çыхăннă тĕрлĕ мероприяти иртрĕ. Тутарла-пушкăртла кĕрешсе, штанга, пукан йăтса, тĕрлĕ дистанцире çуран, велосипедпа ăмăртса çĕнтернисем парнеллĕ пулчĕç.
Кĕçĕнреххисене карусель илĕртрĕ. Хут çĕленсем вĕçни пăхма интереслĕ пулчĕ. Сцена çинче вара юрă-ташă ăстисем хуçаланчĕç. Тĕрлĕ наци чĕлхипе шăранчĕç юрăсем. Суту-илÿ ярмăркки кунĕпех ĕçлерĕ. Ача-пăча пылак çимĕç çисе киленчĕ. А. АСТРАХАНЦЕВА.