20 июня 2009 г.
«Акатуй-Сабантуйăн» иккĕмĕш кунĕн спорт программи те пуян пулчĕ. Малтанах спортсменсен, физкультурниксен, спорт ветеранĕсен парачĕ иртрĕ. Патăрьел районне чылай ăмăртусенче чапа кăларнă, чапа кăларма хатĕрленекенсем мăнаçлăн утса иртрĕç тĕп трибуна умĕпе.
Парад хыççăнах халăх йывăр атлетсен тата кĕрешекенсен помосчĕсем патне пухăнма тытăнчĕ.
Тутарла-пушкăртла кĕрешекенсем 65, 75, 85 кг таранчченхи тата 85 кг ытларах виçесенче ăмăртрĕç. Хăйсен виçисенче М. Глухов, М. Хасянов, И. Махмутов, Р. Валеев паттăра тухрĕ. Абсолютлă паттăр пулассишĕн И. Махмутовпа Р. Валеев кĕрешрĕç. Хисеплĕ ята И. Махмутов çĕнсе илчĕ.
Ирĕклĕ майпа кĕрешекенсем тăватă виçере тупăшрĕç. Хăйсен ушкăнĕсенче А. Анисимов, А. Паймулов, С. Власов, В. Фомин мала тухрĕç. Абсолютлă паттăр ячĕшĕн А. Анисимовпа В. Фомин тупăшрĕç. Çивĕч кĕрешÿре В. Фомин Акатуй паттăрĕ пулса тăчĕ. Çак ята вăл пĕлтĕр те çĕнсе илнĕччĕ.
Пукан йăтакансем икĕ виçе категорийĕ тăрăх вăй виçрĕç. 70 кг таранччен виçере А. Иваничев çĕнтерчĕ. 70 кг ытлараххисен хушшинче тĕнче класлă спорт мастерĕ Б. Глинкин чăннипех тĕлĕнтерчĕ, ыттисене чылай кая хăварса, çĕнтерчĕ.
Штанга йăтакансем те кăтартрĕç хăйсен ăсталăхне. 70 кг таранчченхи виçере А. Пагунов, 70 кг ытларах виçере И. Ишмуратов мала тухрĕç.
Велосипед спорчĕн тусĕсем кăçал пĕлтĕрхинчен ытларах старта тухрĕç. Вĕсене миçе çултине кура ушкăнсем тăрăх уйăрчĕç. Çав ушкăнсенче П. Павлов, В. Афанасьев, М. Емельянов, А. Матвеев çĕнтерчĕç. Сăмах май калакан велоспортра халĕ те Нăрваш Шăхальсем «хуçа» пулса тăраççĕ., 20-е яхăн велосипедист хутшăнчĕ вĕсенчен. Турхан шкулĕ вара вĕсен «урипе таптама» пуçларĕ теме пулать.
Инçĕшне чупакан çăмăл атлетсем те хăйсен çулне кура пайланă ушкăнсенче ăмăртрĕç. Малти вырăнсене Н. Ларионов, М. Зайцев, Т. Давыдов, П. Макаров йышăнчĕç.
Аслă çулхи волейболистсем те вăй виçрĕç иккĕмĕш кун «Акатуй-Сабантуйра». Çичĕ команда хутшăнчĕ уяв турнирне. Арçынсен командисем хушшинче чи вăйли – Чăваш патшалăх университечĕн волейболисчĕсем.
Çитĕннисем алă вăйĕ виçес енĕпе (армспорт) хăйсен пултарулăхне туллин кăтартма тăрăшрĕç. Хăйсен виçисенче Р. Салихов, А. Осипов, А. Атласкин, хĕрарăмсен ушкăнĕнче А. Алеева, Ю. Калмыкова, Л. Ахсянова, Е. Еремеева мала тухрĕç.