27 июня 2009 г.
Усал тени куçа курăнса килмест. Нумай пулмасть хăрушă çил-тăвăл вăйĕ Алманчăсене шар кăтартрĕ, шкул çурчĕн тăррине йăлтах сирсе ывăтрĕ, уйрăм çынсен хуралтисене сиенлерĕ. Юрать-ха, çынсемпе нимĕн те пулман.
Çакнашкал инкек-синкек, усал-тĕсел ял çыннине урăх ан килсе çулăхтăр, çынсене сăтăр ан тутăр, сывлăхне ан хавшаттăр тесе ял халăхĕпе пĕр чĕлхе тупса Алманчă чиркÿ настоятелĕ Серафим атте тата ял тăрăх пуçлăхĕ Г. Фомин тăрăшнипе ялăн тăватă енне те пысăк йывăç хĕрессем лартнă. Çак кунсенче вĕсене кĕлĕ туса тасатма хатĕрленеççĕ.