27 июня 2009 г.
Çуртсен списокне тăвасси çырава хатĕрленес ĕçре тĕп вырăн йышăнать. Вăл халăха туллин шута илме май парĕ. Кунсăр пуçне 2010 çулта Пĕтĕм Раççейри халăх çыравне ирттернĕ чухне хуласене тата ялсене çырав, шут участокĕсене пайлама, тĕп кампани тапхăрĕнче миçе çынна ĕçе явăçтарассине те палăртма кирлĕ.
Çуртсен малтанласа хатĕрленĕ списо-кĕпе ялсен схема-планĕ пур ĕнтĕ. Халĕ пурăнакан е пурăнман килсене, общежитисене, больницăсене, ветерансемпе ваттисен çурчĕсене, лавккасене, столовăйсене, кантурсемпе офиссене тата ытти çурт-йĕре тепĕр хут тĕрĕслесе тухмалла. Районта вĕсем 14,5 пин пуçтарăнаççĕ.
Яваплă ĕçе пурнăçлама 24 регистратор хутшăнать: кашнине 500-700 çурт тивет. «Тĕрĕслевçĕсенчен» улттăшĕ аслă пĕлÿллĕ, вун çиччĕшĕ ятарлă вĕренÿ заведенийĕ пĕтернĕ. Вĕсем хушшинче хĕр-арăмсем ытларах. Ăнсăртран лекнисем ан пулччăр тесе кандидатурăсене ял тăрăх пуçлăхĕсемпе канашласа палăртрăмăр.
Утă уйăхĕн 1-мĕшĕнче регистраторсене района пухса вĕренÿ занятийĕ йĕркелетпĕр, инструкципе паллаштаратпăр, ĕнентерекен документсем тата папкăсем паратпăр. Ĕçе вара тепĕр кунах пикенмелле, 20 кун хушшинче вĕçлемелле.
Г. АФАНАСЬЕВ,
районти çырав ыйтăвĕсемпе ĕçлекен уполномоченнăй.