27 июня 2009 г.
Шоссе çинче велосипедпа ярăнса ăмăртмалли Чăваш Ен чемпионачĕ Вăрмарта иртрĕ. Унта пирĕн районăн пĕрлештернĕ команди те хутшăнчĕ.
Пĕрремĕш кун велосипедистсем уйрăмшарăн ярăнса тупăшрĕç. Кунта 1997-1998 çулсенче çуралнисенчен С. Михайлова иккĕмĕш вырăн, 1995-1996 çулсенче çуралнисенчен А. Михайлова иккĕмĕш вырăн йышăнчĕç. 1995-1996 çулсенче çуралнă арçын ачасем хушшинче М. Емельянов иккĕмĕш вырăна тухма пултарчĕ.
Иккĕмĕш кун пирĕн спортсменсем ăнăçлăрах ăмăрт-рĕç. 1995-1996 çулсенче çуралнисенчен А. Михайловăна çитекенни пулмарĕ, вăл пĕрремĕш вырăна çĕнсе илчĕ. Хăйĕн аппăшĕн çĕнтерĕвĕпе хавхаланса С. Михайлова та ăнăçлă ăмăртрĕ, пурне те кая хăварса Чăваш Республикин чемпионки пулса тăчĕ.
Çĕнтерÿçĕсене ЧР Физкультурăпа спорт тата туризм министерстви дипломсемпе медальсем парса чысларĕ.
Çак ăмăртăвăн кăтартă-вĕсене шута илсе Чăваш Республикин пĕрлештернĕ командине йĕркелерĕç. Ун йышне Анастасия Михайловăна, Снежана Михайловăна тата Максим Емельянова кĕртрĕç. Вĕсем спорт шкулĕн Нăрваш Шăхалĕнчи И. Калентьева ячĕллĕ уйрăмĕнче ăсталăха туптаççĕ. Халĕ августра Самарăра иртекен Раççей чемпионатне тăрăшсах хатĕрленеççĕ.
В. МИХАЙЛОВ,
велоспорт федерацийĕн ертÿçи.