04 июля 2009 г.
Сывă пурнăç йĕркине çирĕплетес, çамрăксен социаллă пĕлтерĕшлĕ пуçарăвĕсене аталантарас тата культурăллă канăвне йĕркелес, физкультурăпа спорта анлăрах явăçтарас тĕллевпе районти çамрăксен канашĕсен III фестивалĕ иртнĕ. Тутар Сăкăтри тĕп стадиона 14 ял тăрăхĕнчи çамрăксен канашĕсен 300 представителĕ пухăннă.
Фестивале килнисене район пуçлăхĕ Н. Глухов, райадминистрацин вĕрентÿ пайĕн начальникĕн çумĕ Н. Афанасьев, Тутар Сăкăт ял тăрăх пуçлăхĕ Н. Хасянов, çамрăксен районти Коор-динаци канашĕн председателĕ А. Иванова саламланă, ăнăçусем, çитĕнÿсем суннă.
Фестиваль уçăлсанах патшалăх çамрăксем пирки тытса пыракан политикăна пурнăçа кĕртессипе палăрнă активист-общественниксене, «Çамрăксен чи лайăх наставникĕ-2009», «Çамрăк çемье-2009» конкурссен районти тапхăрĕнче çĕнтернисене наградăсем панă. Тутар Сăкăт çамрăкĕсем паха концерт кăтартнă.
Малалла фестивале хутшăнакансем спорт енĕсенче вăй виçнĕ. Программăра эстафета чупасси, тулли лав туртасси, михĕ тăхăнса, кĕвенте йăтса чупасси, пĕрене çине ларса тулли михĕпе «çапăçасси», вĕрен туртасси пулнă. Кашни енпех тупăшма йышлăн хутшăннă.
Виçĕ сехете пынă ăмăртусене пĕтĕмлетсен Кзыл Чишма ял тăрăхĕнчи çамрăксен канашĕн команди çĕнтерни палăрнă, иккĕмĕш вырăна хуçасем – Тутар Сăкăтсем йышăннă, Патăрьел ял тăрăхĕнчи çамрăксен канашĕн команди виççĕмĕш.
Кăсăклă вăйă-конкурссем чылай ирттернĕ. Вĕсенчен пĕри – кăвайтă чĕртсе апат пĕçересси. Ăмăртусенче вăй-хал пĕтернĕ хыççăн ку конкурс уйрăмах вырăнлă пулнă.
Мала тухнисене Хисеп хучĕсемпе, хаклă парнесемпе чысланă.
А. АЛЕКСЕЕВ.