04 июля 2009 г.
Шупашкарти агрегат завочĕн клубĕнче «Чуваш Республикинчи ĕçлев сыхлавĕн чи лайăх специалисчĕ» 2009 çулхи конкурс иртнĕ. Ăна ĕçлев сыхлавĕн специалисчĕсен професси ăсталăхне тата пĕлтерĕшне ÿстерес, производствăра сусăрланасран асăрхаттарас, общественноçа ĕçлеве тата çынсен сывлăх сыхлавне тимлĕрех пăхма явăçтарас тĕллевпе йĕркеленĕ.
Конкурса Чуваш Республикин Сывлăх сыхлавĕпе социаллă аталану министрĕн çумĕ, комисси председателĕ Л. Рулькова кĕске сăмах каласа уçнă, çак конкурса виççĕмĕш хут ирттернине тата унта хутшăнакансен шучĕ çулран çул ÿсни çинчен пĕлтернĕ, конкурса килнисене çитĕнÿ суннă.
Финалти тупăшăва республикăри 15 районтан тата 5 хуларан 22 специалист хутшăннă. Вĕсем экономикăн 10 отраслĕнчен.
Патăрьел районĕн чысне республикăри конкурсра Турханти психоневрологи интернатĕнчи ĕçлев сыхлавĕн специалисчĕ Леонид Сердюков хÿтĕленĕ. Çивĕч ăмăртура вăл творчество енĕпе иртнĕ номинацире çĕнтернĕ. Ытти енĕпе те пултарулăхпа палăрнă.
(Хамăр корр.).