04 июля 2009 г.
Патăрьел районĕн прокуратури финанс тата экономика отраслĕсенче шалупа çыхăннă саккунсем мĕнле пурнăçланса пынине яланхи сăнавра тытать. Çавна май тĕрлĕ харпăрлăхри предприятисене, уйрăм предпринимательсене тăтăшах тĕрĕслетпĕр.
Прокуратура граждансен ĕçлев прависене пăснă тĕслĕхсем пирки тивĕçлĕ мерăсем йышăнсах пырать, айăплисене çийĕнчех явап тыттарать. Акă, кăçал пилĕк уйăхра ĕçлев законодательствине мĕнле пурнăçласа пынине пĕлес шутпа 35 тĕрĕслев ирттернĕ, вăл шутра 31-шĕ ĕç укçи пирки. Вĕсем хыççăн 9 ертÿçе представлени ярса панă (вăл шутра 5-шĕ ĕçшĕн тÿлесси çинчен), 12 протест тăратнă, шутланă анчах тÿлемен шалăва пама суд приказĕ кăларас пирки 231 ыйтăва суда янă. 7 асăрхаттару пĕлтернĕ, пĕр административлă ĕç пуçарнă. Тÿлемен шалу калăпăшĕ 920 пин тенкĕ пулнă.
Шалупа çыхăннă саккунсене пăсасси уйрăм предпринимательсем хушшинче те пысăк шайра. Сăмахран, С.А. Молочникова шалăва уйăхра пĕрре çеç тата чи пĕчĕк ĕç укçинчен те сахалрах тÿлет. Саккунпа шалăва уйăхра икĕ хут чи пĕчĕк ĕç укçинчен кая мар памалла. Саккунăн çак йĕркисене Т.В. Антонова, Р.Н. Резяпов, И.Н. Цветкова, Р.Р.Феизова предпринимательсем те пăснă, Т. Антонова вара ĕçлекенĕн ĕç кĕнекине те çырман, обязательнăй тÿлевсемпе те парăма кĕнĕ. Вĕсем пирки административлă ĕç пуçарса ЧР Патшалăх ĕçлев инспекцине çитернĕ, унсăр пуçне 2-3 пин тенкĕ штрафланă.
Çул çитмен çамрăксене ĕçе вырнаçтарассипе те саккуна пăснă тĕслĕхсем тупса палăртнă. Вĕсем валли ĕç кĕнеки çырман пирки 15 тавăç ыйтăвĕ тăратнă.
Граждансен ĕçлев прависене пăсма юраманнине кашни ертÿçĕн яланах асра тытмалла, уйрăмах шалу тÿлессине яланхи тимлĕх уйăрмалла.
Ю. ФУРАЖНИКОВ,
район прокурорĕ.